Pediatr-immunoloq Andrey Prodeus uşaqlarda tez-tez rast gəlinən Koksaki virusunun əsas əlamətlərini açıqlayıb. Xəstəlik ağızda səpgilərlə başlayır və bu, ağrılı stomatitlə müşayiət olunur.

Azmedinfo.az "Actualnews"a istinadən yazır ki, həkimin sözlərinə görə, tezliklə səpgilər əllərin içində, ayaq altlarında və omba nahiyəsində də əmələ gəlir. Bu səpgilər ağ rəngli maye ilə dolu kiçik qabarcıqlar formasında olur. Bir-iki gün ərzində uşaqda tez-tez 39°C-yə qədər hərarət yüksəlir, ishal və qusma başlayır.

O, bildirib ki, Koksaki virusuna qarşı nə spesifik müalicə, nə də peyvənd mövcuddur. Terapiya simptomların yüngülləşdirilməsinə yönəlir. İshal və susuzlaşma əlamətləri olduqda uşağa tez-tez, az-az maye vermək tövsiyə olunur. Temperatur 37,5°C-dən yuxarı qalxdıqda hərarətsalıcı, qaşınma zamanı isə antihistamin preparatları istifadə edilməlidir.

Daha əvvəl terapevt-immunoloq Vladislav Jemçuqov bildirib ki, Koksaki virusu zamanı səpgilər məxmərək və suçiçəyi səpgilərinə bənzəyir. Onun sözlərinə görə, xəstəliyin ilkin əlamətlərinə həmçinin yüksək hərarət, əzələ ağrıları və həzm pozuntuları daxildir.

Həkimlər xatırladır ki, bu simptomlar müşahidə olunduqda digər təhlükəli infeksiyaları istisna etmək və fəsadların qarşısını almaq üçün dərhal həkimə müraciət etmək lazımdır.