Ağciyərlərdə gizli qalan xərçəng hüceyrələr COVID-19 və ya qripdən sonra aktivləşərək yeni metastatik şişlər yarada bilər. Bu, əvvəllər xərçəng keçirmiş və remissiyada olan xəstələrdə risk yaradır.

Azmedinfo.az "Nature" jurnalında dərc olunan araşdırmaya diqqət çəkib:

Metastatik döş xərçəngi üzərində aparılan tədqiqat göstərib ki, bəzi hallarda bu “yatmış” hüceyrələr aktivləşərək xəstəliyin təkrarlanmasına səbəb olur. Müəlliflər bildirirlər ki, virus infeksiyaları bu prosesin əsas səbəblərindən biri ola bilər.

Siçanlar üzərində aparılan təcrübələrdə qrip A və SARS-CoV-2-yə yoluxmadan sonra ağciyərlərdəki hüceyrələr sürətlə çoxalıb və iki həftə ərzində xərçəng ocaqları yaranıb.

İki geniş populyasiya araşdırması da nəticələri təsdiqləyib:

Britaniya Biobankı: COVID-19, remissiyadakı xəstələrdə xərçəngdən ölüm riskini demək olar ki, iki dəfə artırıb.

Flatiron Health Database (ABŞ): COVID-19-a yoluxan döş xərçəngi xəstələrində ağciyər metastazı riski 50% yüksək olub.

Mexanizmin, infeksiyaya qarşı müdafiədə iştirak edən, lakin xərçəng hüceyrələrinin çoxalmasına da səbəb ola bilən interleykin-6 (IL-6) ilə əlaqəli olduğu müəyyən edilib.