Səhiyyə Nazirliyi bəzi estetik məqsədli inyeksiya preparatlarının qanunsuz istifadəsi ilə bağlı əhaliyə rəsmi xəbərdarlıq edib.

Azmedinfo.az xəbər verir ki, Analitik Ekspertiza Mərkəzindən verilən məlumata görə, bəzi özəl tibb müəssisələrində “Botulinum toksini” (botoks), hialuron turşusu tərkibli dolğular və mezopreparatlar (vitamin, amin turşusu, peptid qarışıqları) rəsmi idxal icazəsi və keyfiyyət sertifikatı olmadan tətbiq olunur.

Xatırladılıb ki, Nazirlər Kabinetinin 18 iyul 2024-cü il tarixli 345 nömrəli Qərarına əsasən, ölkəyə gətirilən bütün dərman vasitələri və tibbi preparatlar – o cümlədən estetik inyeksiyalar – yalnız Səhiyyə Nazirliyi tərəfindən dövlət qeydiyyatına alındıqdan sonra idxal oluna bilər. Qeydiyyatsız məhsulların gətirilməsi və istifadəsi qanunvericiliklə qadağandır.

Mütəxəssislər xəbərdarlıq edirlər ki, mənşəyi məlum olmayan bu preparatlar sağlamlıq üçün ciddi fəsadlar yarada bilər. Onların istifadəsi ağır allergik reaksiyalar, sinir sistemi pozuntuları, dəri toxumalarının zədələnməsi və digər ağır nəticələrə səbəb ola bilər. Nazirlik vətəndaşlara yalnız lisenziyası olan tibb müəssisələrinə müraciət etməyi və prosedurların peşəkar həkimlər tərəfindən icra olunmasını tövsiyə edir.