“Azərbaycanda səhiyyə, sosial müdafiə və mənzil şəraiti” adlı rəsmi statistik məcmuəyə əsasən, 2024-cü ildə ölkədə ümumilikdə 101 066 uşaq dünyaya gəlib. Onların 74 563-ü təbii doğuş yolu ilə, 69 913-ü isə qeysəriyyə əməliyyatı vasitəsilə həyata keçirilib.

Azmedinfo.az xəbər verir ki, hesabat həmçinin abort göstəricilərinə də aydınlıq gətirir. 2024-cü ildə Azərbaycanda 78 245 abort qeydə alınıb. Bu əməliyyat üçün müraciət edənlər arasında 72 nəfər 15-17 yaş qrupunda, 2 679 nəfər isə 18-19 yaş aralığında olub. Mütəxəssislər erkən yaşda hamiləlik və abort hallarının sağlamlıq risklərinə diqqət çəkərək, bu istiqamətdə maarifləndirmə tədbirlərinin gücləndirilməsini zəruri hesab edirlər.

Statistik məcmuədə İnsanın immunçatışmazlığı virusu (İİV) ilə bağlı göstəricilər də yer alıb. Ötən il ölkə üzrə 11 844 nəfər İİV səbəbilə tibb müəssisələrində qeydiyyatda olub ki, bu da 2023-cü ildəki 10 692 nəfərlə müqayisədə artım deməkdir. 2024-cü ildə ilk dəfə İİV diaqnozu qoyulanların sayı 1 152 nəfər olub (2023-cü ildə 886 nəfər). Həmçinin 18 yaşından kiçik 3 nəfərdə virus aşkar edilib.

Qazanılmış immunçatışmazlığı sindromu (QİÇS) diaqnozu ilə 2024-cü ildə 2 964 nəfər qeydiyyatda olub. Ötən il bu göstərici 2 844 nəfəri təşkil edib. Bundan başqa, 2024-cü ildə 120 nəfərdə yeni QİÇS halı müəyyən edilib ki, bu da 2023-cü ildə qeydə alınan 169 nəfərlə müqayisədə azalmadır.