İnvaziv kardioloq Qalib İmanov tanınmış çinli kardiocərrahın apardığı ürək əməliyyatlarında iştirak edib

15 Avqust 2025

1528

Yeni Klinikanın direktor müavini, Ürək-Damar Mərkəzinin rəhbəri, tibb üzrə fəlsəfə doktoru, invaziv kardioloq Qalib İmanov Çin Xalq Respublikasında yerləşən “Fuwai” Xəstəxanasının (Milli Ürək-Damar Xəstəlikləri Mərkəzi) Struktur Ürək Xəstəlikləri Mərkəzinin direktoru, dünyaca tanınmış hibrid ürək-damar cərrahı Xiang-Bin Pan tərəfindən Qazaxıstanın Astana şəhərində təşkil olunan beynəlxalq masterklasslarda iştirak edib.

Azmedinfo.az xəbər verir ki, təlimlərdə “Perkutan və Flüoroskopiyasız Prosedur” (PAN proseduru) – angioqrafiya cihazı əvəzinə ultrasəs nəzarəti altında icra olunan innovativ perkutan müdaxilə terapiyası təqdim olunub. Təlim zamanı Qalib İmanov prosedurun bütün mərhələlərində iştirak edərək praktiki təcrübə qazanıb.

Üç gün davam edən proqram çərçivəsində invaziv kardioloq ümumi narkoz, açıq ürək əməliyyatı, radiasiya və kontrast maddələrin yaratdığı risklər olmadan icra edilən, xüsusilə hamilə qadınlar və böyrək çatışmazlığı olan pasiyentlər üçün daha təhlükəsiz, əlçatan və sərfəli müalicə imkanı verən 28 PAN prosedurunun icrasında iştirak edib.

Məlumat üçün bildirək ki, Xiang-Bin PAN, FACC, FESC ultrasəs nəzarəti ilə işləyən 40 patentli xüsusi tibbi alət ixtira edərək prosedurun texniki çətinliklərini minimuma endirib və daha çox insanın həyatını xilas etməyə imkan yaradıb. Hazırda Çin və Avropa tərəfindən təsdiqlənmiş 11 tibbi alət dünyanın 40-dan çox ölkəsində tətbiq olunur.

Professor Pan indiyədək Fransa, Tayland, Yaponiya, Malayziya, Filippin, İndoneziya, Qazaxıstan və digər ölkələr daxil olmaqla 23 ölkədə canlı əməliyyat nümayişləri həyata keçirib.

Qeyd edək ki, metod tibbi avadanlıqlardan asılılığı minimuma endirdiyi üçün adi struktur ürək xəstəliklərinin ambulator şəraitdə, hətta kənd yerlərində belə müalicəsinə imkan yaradır.