Ali kateqoriyalı psixoloq, NLP-psixoterapevt, hipnoterapevt və kognitiv-davranış mütəxəssisi Sergey Lunyuşin psixosomatik pozğunluqların inkişaf səbəbləri haqqında danışıb.

Azmedinfo.az xəbər verir ki, RuNews24.ru informasiya agentliyinə müsahibəsində o bildirib ki, bu pozğunluqların səbəblərindən biri mənfi təcrübə və ya uzunmüddətli stressdir.

"Belə travmatik təcrübə zaman keçdikcə fiziki simptomlar və ya xəstəliklər şəklində özünü göstərə bilər. Keçmiş travmaya bənzəyən tətikləyici situasiyalar şüuraltı mexanizmləri aktivləşdirərək sağlamlığın pisləşməsinə səbəb ola bilər", — deyə S.Lunyuşin qeyd edib.

Onun sözlərinə görə, daxili konfliktlər də, xüsusilə perfeksionistlərdə, psixosomatik pozğunluqların yaranmasına səbəb ola bilər.

«Psixosomatika həmçinin ətrafdakılardan diqqət çəkmək vasitəsi kimi də xidmət edə bilər. Məsələn, insan şüuraltı və ya qəsdən xəstələnərək yaxınlarının və ya ətrafdakilərin daha çox diqqətini cəlb edə bilər», — deyə ekspert bildirib.

Lunyuşin əlavə edib ki, əgər yaxın biri ciddi xəstədirsə, insan özünü də həmin vəziyyətə meyilli hesab etməyə başlaya bilər.