Rusiya Elmlər Akademiyasının Tibb-Bioloji Problemlər İnstitutunun alimləri əzələ atrofiyasına qarşı mübarizədə böyük nailiyyət əldə ediblər.

Azmedinfo.az xəbər verir ki, “İzvestiya”nın məlumatına görə, kosmonavtlara, yaşlı insanlara və hərəkət qabiliyyəti məhdud şəxslərə kömək edə biləcək yeni metod hazırlanıb.

Tədqiqat nəticələri göstərib ki, “hərəkət hormonu” kimi tanınan MOTS-c peptidi, uzunmüddətli fiziki hərəkətsizlik fonunda əzələləri zəifləməkdən qoruyur. Eksperiment zamanı alimlər MOTS-c peptidini yeddi gün ərzində çəkisizlik şəraitini imitasiya edən mühitdə saxlanılan siçovullara yeridiblər. Bu müddət ərzində onların arxa ayaqlarına yük düşməyib ki, bu da yeriməyə cavabdeh olan kamabaloid əzələlərdə atrofiya yaradıb.

Nəticələrə görə, “hərəkət hormonu” inyeksiyası edilən siçovullarda əzələ həcmi cəmi 15–20% azalıb. Müalicə almayan siçovullarda isə bu göstərici 30–35% olub. Bundan əlavə, müalicə almayan heyvanlarda əzələ dözümlülüyü iki dəfədən çox azalıb, lakin peptid qəbul edənlərdə dözümlülük normal səviyyədə qalıb.

Tibbi statistika göstərir ki, fiziki aktivlik səviyyəsi aşağı olan dünya əhalisinin təxminən üçdə biri əzələ zəifləməsi və kütləsinin azalması problemi ilə üzləşir. Bu səbəbdən alimlər əzələ toxumasının vəziyyətinə təsir edən digər faktorları da araşdırmağı planlaşdırır. Xüsusilə, onların diqqət mərkəzində əzələlərdə kalsium miqdarı və onun dözümlülük, eləcə də digər funksional göstəricilərə təsiri olacaq.