Ankarada yaşayan 8 yaşından bəri sol ayağında sümük şişi (tümör) ilə mübarizə aparan və uzun müddət yatağa bağlı qalan Seher Karakuş üçüncü əməliyyatdan sonra yenidən ayağa qalxdı.

Azmedinfo.az "TRT Haber"ə istinadən yazır ki, Diyarbəkirdə yaşayan Seher Karakuşun sol ayağında hələ uşaq yaşlarında şiş aşkarlanıb. Kimyaterapiya və iki əməliyyata baxmayaraq xəstəlik irəliləyib. İnfeksiya səbəbindən ayağında qısalma yaranan Seher artıq yeriyə bilmirdi. Həkimlər ayağının kəsilməsini təklif etsələr də, ailəsi onu Ankarada xüsusi xəstəxanaya aparıb. Burada keçirilən üçüncü əməliyyat zamanı şiş tamamilə çıxarılıb. Əməliyyat nəticəsində 25 santimetr olan qısalma 10 santimetrə endirilib. Seher artıq qoltuq ağacı ilə yeriyir.

Xəstəlik və müalicə dövründə yazdığı gündəlikləri bir kitabda toplayan Seher, sağalma və ayağa qalxma mübarizəsini ikinci kitabında qələmə alır.

"Ən çox qorxduğum ayağımın kəsilməsi idi"

Seher Karakuş xəstəliyi haqqında danışarkən bildirib: “8 yaşımda ayağımda şiş olduğunu dedilər. Kimyaterapiya aldım, əməliyyatlar keçirdim, infeksiya oldum. Ayağımın kəsilməsini istəmirdim. Murat hoca əməliyyatı üzərinə götürdü və uğurla həyata keçirdi. Çox çətin əməliyyat idi. İndi çox xoşbəxtəm.”

"Xəstələrə örnək olsun deyə yazdım"

Seher deyir ki, xəstəxanada darıxdığı üçün gündəlik yazırmış: “Çiğdem xalam dedi ki, bunu kitaba çevirək, başqalarına nümunə olsun. Mən də razılaşdım. İlk kitabı 10 yaşımda yazmağa başladım, indi ikinci kitab üzərində işləyirəm.”

Həkimlərin fikirləri

Seherin həkimi Prof. Dr. Şefik Murat Arıkan: “Əsas məqsədimiz onu yataqdan qaldırmaq idi və buna nail olduq. Gələcəkdə tamamilə desteksiz yeriyə biləcək. Son bir əməliyyatla qısalığı da düzəldəcəyik.”

Op. Dr. Sinan Yılmaz: “Bu xəstəliklər çox vaxt əlil qalma və ya uzuv itkisi ilə nəticələnir. Seherin ayağını qoruduq, ən əsası isə xərçəngi məğlub etdik. İndi məqsədimiz onu gündəlik həyata qaytarmaqdır.”