Stanford Universitetinin mühəndisləri günəş enerjisindən istifadə edərək sidiyi dəyərli gübrəyə çevirməyə və eyni zamanda elektrik enerjisi istehsal etməyə imkan verən qurğu hazırlayıblar.

Azmedinfo.az xəbər verir ki, tədqiqat işi "Nature Water" jurnalında dərc olunub.

Prototip sidikdən ammiak çıxarır, onu kənd təsərrüfatında tələb olunan gübrə olan amonium sulfatına çevirir. Sistem elektrik şəbəkəsinə qoşulmağa ehtiyac duymur: işləməsi üçün yalnız günəş panelləri kifayətdir. Həmçinin qurğu panellərin arxa səthində itən istiliyi istifadə edərək kimyəvi prosesləri sürətləndirir və onların effektivliyini artırır.

Tədqiqatçılar vurğulayırlar ki, hər insan sidiyi ilə o qədər azot buraxır ki, bununla bağçasını gübrələmək mümkündür. Eyni zamanda dünya hələ də bahalı idxal gübrələri alır, halbuki onları “yerində”, birbaşa günəşdən istifadə etməklə istehsal etmək olar.

Yeni texnologiya bir neçə problemi həll edə bilər: gübrəyə çıxış təmin edir, elektrik enerjisi istehsal edir və sanitar şəraitin yaxşılaşdırılmasına yardım edir. Ekspertlər xatırladırlar ki, hazırda dünyada tullantı sularının 80%-dən çoxu təmizlənmir, bu isə torpağı və su hövzələrini çirkləndirir. Təklif olunan sistem isə tullantı suları ekoloji cəhətdən təmiz və təkrar istifadəyə yararlı edir.

Tədqiqat müəllifi Kumbs bildirib: "Biz su, qida və enerjini ayrı sahələr kimi nəzərdən keçiririk, amma bu, mühəndislik həllinin eyni anda bütün bu istiqamətlərdə kömək etdiyi nadir hallardan biridir."