Orqan transplantasiyası həm həyat, həm ümid, insanlıq və fədakarlıq deməkdir. Uyğun orqan gözləyən dializ xəstələrinin ölümdən sonra orqanlarını bağışlaması isə insanpərvərlik nümunəsidir.

Azmedinfo.az xəbər verir ki, Kamil Zeynalov və İmanqulu Əmənova illər öncə böyrək köçürülüb. Onlar transplantasiyanı ümidlə gözləyən xəstələrin hisslərini yaxşı tanıyırlar və həmin xəstələrə dəstək olmaq üçün nəcib addım atıblar. Hazırda dializ müalicəsi alan Elşən Əliyev və İlqar İmanlı isə uyğun donor tapılacağı günü gözləyirlər.

Elşən Əliyev deyir: “Biz təkcə özümüz üçün yaşamırıq. Bir gün bu dünyadan köçsəm, istəyirəm ki, mənim orqanlarım başqa insanlara həyat versin.”

İlqar İmanlı əlavə edir: “Əgər mənə transplantasiya qismət olmasa, qoy hansısa xəstəyə həyat ümidi olum. Ölüm sonrası hansı orqan və toxumaların istifadəyə yararlı olacağına həkimlər qərar verirlər. Qoy gözlərim bir uşağın dünyanı görməsinə səbəb olsun.”

Bu dörd nəfərin ölümdən sonra orqanlarını bağışlamaq üçün sənəd imzalaması onların həyata və insanlığa verdiyi böyük dəyəri göstərir: “Yaşamaq da, yaşatmaq da gözəldir. Həm gözləyirəm, həm bağışlayıram.”

Hazırda ölkəmizdə 5 minə yaxın insan dializ müalicəsi alır və onların əksəriyyəti transplantasiya üçün uyğun donor gözləyir. Ölümdən sonra orqan ianəsi bu insanların həyatını xilas edə bilər. Elşən və İlqar kimi həm orqan gözləyən, həm də həyat bağışlayan xəstələrə siz də ümid ola bilərsiniz.

Orqan Donorluğu və Transplantasiyası üzrə Koordinasiya Mərkəzi