Hər gün okeanlara, dənizlərə, çaylara və göllərə minlərlə plastik tullantı atılır. Bu isə ekosistemlərin tarazlığını pozur, iqlim böhranına qarşı müqavimətini zəiflədir və milyonlarla insanın dolanışığına, ərzaq təhlükəsizliyinə və rifahına mənfi təsir göstərir.

Azmedinfo.az Ekologiya və Təbii Sərvətlər Nazirliyinin məlumatına əsasən yazır ki, mütəxəssislərin bildirdiyinə görə, plastiklərin tərkibindəki kimyəvi maddələr həm insan sağlamlığı, həm də təbiət üçün ciddi təhlükə yaradır. Bu səbəbdən birdəfəlik plastiklərin istifadəsindən imtina edilməsi vacibdir.

Məsuliyyət hər kəsin üzərinə düşür. Alış-veriş zamanı birdəfəlik paketlər əvəzinə parça və ya çoxistifadəli ekoçantalardan istifadə etmək, plastik qablaşdırması az olan məhsullara üstünlük vermək, təkrar istifadə edilə bilən su qabı və termoslardan yararlanmaq, həmçinin tullantıları düzgün çeşidləyib müvafiq təhvil qutularına atmaq tövsiyə olunur.

Kiçik vərdişlər böyük dəyişikliklər yarada bilər.