Polikistik yumurtalıq sindromu (PCOS) qadınlarda ən çox rast gəlinən hormonal və metabolik pozğunluqlardan biridir. Bu zaman yumurtalıqlarda çoxlu xırda kistalar əmələ gəlir, hormonal balans pozulur. Nəticədə aybaşı dövrünün nizamsızlığı, üz və bədəndə həddindən artıq tüklənmə, sızanaqlar, çəki artımı, ovulyasiyanın zəifləməsi və hətta sonsuzluq kimi problemlər meydana çıxa bilər.

Azmnedinfo.az ÜST-0ün məlumatına istinadən yazır ki, mütəxəssislərin rəyinə görə, PCOS-un yaranmasına genetik meyillilik, insulin müqaviməti və androgen hormonlarının artması səbəb olur.

Diaqnostika zamanı aparılan əsas analizlər:

LH və FSH – yumurtalıq funksiyasını qiymətləndirir;

AMH – yumurtalıq ehtiyatını göstərir;

Prolaktin – menstrual pozğunluqları aşkar edir;

Estradiol (E2) – qadın hormon səviyyəsini ölçür;

Testosteron, DHEA-S – androgenlərin səviyyəsini müəyyən edir;

İnsulin davamlılığı, HOMA-IR – şəkər mübadiləsini qiymətləndirir;

Lipid profili – xolesterin və trigliseridlərin səviyyəsini göstərir;

USM (ultrasəs müayinəsi) – yumurtalıqlarda kistaların görünməsini təsdiqləyir.

Sağlamlıq tövsiyələri:

Çəkini normada saxlamaq üçün balanslı qidalanmaq və mütəmadi idmanla məşğul olmaq;
Şəkər və sürətli karbohidratların (şirniyyat, ağ un məmulatları) qəbulunu azaltmaq;
Zülal və liflə zəngin qidaları artırmaq;
Stressi minimuma endirmək və yuxu rejiminə diqqət etmək;
Endokrinoloq və ginekoloqun nəzarətində müntəzəm müayinələrdən keçmək.

Mütəxəssislər xəbərdarlıq edirlər ki, vaxtında düzgün diaqnoz və həyat tərzi dəyişikliyi PCOS-un ağırlaşmalarının qarşısını ala bilər.

ÜST PCOS–un qadın sağlamlığına təsirinə dair beynəlxalq səviyyədə maarifləndirməni artırmağa və müvafiq xidmətlərin təşkili, araşdırmaların təşviqi istiqamətində milli sağlamlıq siyasətlərinə dəstək verməyə çalışır