Aralıq dənizi dietası və fiziki fəaliyyət 2-ci tip diabet riskini azaldır

Aralıq dənizi dietası, kalori məhdudiyyəti, müntəzəm fiziki fəaliyyət və mütəxəssis nəzarəti ilə birlikdə 2-ci tip diabetin inkişaf riskini 31 faiz azalda bilər. Bu nəticəyə Harvard Ümumi Sağlamlıq Məktəbinin alimləri və İspaniyadan olan həmkarları gəliblər. 

Azmedinfo.az "Annals of Internal Medicine" jurnalında dərc olunan məqaləyə diqqət çəkib:

Tədqiqatda 55–75 yaş arasında artıq çəkisi və ya piylənməsi, metabolik sindromu olan, lakin diabeti olmayan 4746 nəfər iştirak edib. Bir qrupa klassik Aralıq dənizi diyeti, digər qrupa isə əlavə olaraq gündə təxminən 600 kkal azaldılmış kalori, orta səviyyəli fiziki fəaliyyət və çəki azaldılması üzrə mütəxəssis nəzarəti tətbiq olunub.

Altı ildən sonra kompleks müdaxilə qrupunda diabet riski üçdə bir azaldığı müşahidə olunub. İştirakçılar orta hesabla 3,3 kq çəkisini itirib və bel dairəsini 3,6 sm azaldıblar, kontrol qrupunda isə bu göstəricilər yalnız 0,6 kq və 0,3 sm olub.

Müəlliflərin sözlərinə görə, dietanın, hərəkətin və kalori məhdudiyyətinin kombinasiyası hər 100 nəfər üçün təxminən üç diabet halının qarşısını ala bilər ki, bu da ictimai sağlamlığa əhəmiyyətli töhfə verir.