“Özəl tibb fəaliyyəti haqqında” Qanuna əsasən, xüsusi tibb müəssisələri yalnız tibbi xidmətlərin müəyyən istiqamətləri üzrə verilmiş lisenziya əsasında və həmin sahəyə uyğun ixtisası olan mütəxəssislərlə əmək müqaviləsi bağladıqdan sonra fəaliyyət göstərə bilərlər.

Azmedinfo.az xəbər verir ki, bu barədə Səhiyyə Nazirliyinin rəsmi “Instagram” səhifəsində keçirilən canlı yayım zamanı Analitik Ekspertiza Mərkəzinin Hüquq şöbəsinin müdiri Tamam Həsənova məlumat verib.

Onun sözlərinə görə, müəssisə rəhbəri tibbi fəaliyyətə görə birbaşa məsuliyyət daşıyır və tibbi heyətlə bağlı bir sıra tələblərin yerinə yetirilməsinə nəzarət etməlidir:

* “Əhalinin sağlamlığının qorunması haqqında” Qanuna uyğun olaraq tibb işçiləri müntəzəm tədris və sertifikasiyadan keçməlidirlər;
* Sertifikasiyadan keçməyən şəxslərin praktik tibb fəaliyyəti ilə məşğul olması yolverilməzdir;
* Müəssisə statistik qeydiyyat və hesabatları qanunvericiliyə uyğun aparmalı, onların düzgünlüyünə görə cavabdehdir;
* Pasiyentin sağlamlıq göstəriciləri, tibbi xidmətlərin həcmi və nəticələri ilə bağlı sənədləşmə Nazirliyin müəyyən etdiyi qaydalara əsasən aparılmalıdır;
* Pasiyent tələb etdikdə müəssisə lisenziya, sertifikasiya və digər rəsmi sənədləri təqdim etməlidir;
* Hər bir pasiyent müayinənin və müalicənin nəticələri ilə tanış edilməli, diaqnoz izah olunmalıdır.

T. Həsənova əlavə edib ki, pasiyentin seçimi əsasında müalicə həkimi müəssisə rəhbəri tərəfindən təyin edilir və ehtiyac olduqda, rəhbərlik pasiyentin müraciəti ilə həkimin dəyişdirilməsini təmin etməlidir.

Qeyd olunub ki, vətəndaşlar özəl tibb müəssisələrində qeyri-qanuni fəaliyyət, nöqsan və ya şikayət halları ilə bağlı Analitik Ekspertiza Mərkəzinə “Bir pəncərə” sektoru, (012) 596 05 20 nömrəli qaynar xətt, [aem@pharma.az](mailto:aem@pharma.az) elektron poçt ünvanı və [www.pharma.az](http://www.pharma.az) saytının “Müraciət” bölməsi vasitəsilə müraciət edə bilərlər.

Daxil olan müraciətlər hüquqi çərçivədə araşdırılır və zərurət yarandıqda müvafiq müəssisələrdə plandankənar yoxlamalar aparılır.