Avqustun 28-də Heydər Əliyev Fondunun təşəbbüsü ilə Şamaxının İkinci Cabanı və Böyük Xınıslı kəndlərində müasir körpələr evi-uşaq bağçaları açılıb.

Azmedinfo.az xəbər verir ki, tədbirdə Fondun vitse-prezidenti Leyla Əliyeva iştirak edib.

Leyla Əliyeva yeni inşa olunan müəssisələrə baxış keçirərək, uşaqlar üçün yaradılmış şəraitlə yaxından tanış olub.

Məlumat verilib ki, hər iki bağça kəndlərin mərkəzində yerləşir və tam müasir standartlara uyğun qurulub. Burada balacalar üçün oyun və yataq otaqları, musiqi və idman zalları, yeməkxana, tibb otağı, həmçinin inzibati və texniki bölmələr fəaliyyət göstərəcək. Məktəbəqədər təhsil müəssisələri lazımi avadanlıq və mebellə tam təmin edilib, həyətyanı sahələrdə yaşıllaşdırma işləri aparılıb, uşaqlar üçün əyləncə qurğuları quraşdırılıb.

İkinci Cabanı kənd bağçasının müdiri Töfə Bəşirova jurnalistlərə açıqlamasında bildirib ki, uzun illərdir fəaliyyət göstərən müəssisə əvvəl köhnə və yararsız binada işləyib.

Bildirlib ki, bağça illərdir normal şəraitdən məhrum idi, fəaliyyət fərdi evdə davam etdirilirdi. Heydər Əliyev Fondunun dəstəyi ilə qısa zamanda yeni bina inşa olunaraq istifadəyə verildi. Burada 1–3 və 4–6 yaş qrupları üzrə fəaliyyət göstəriləcək. Qonşu kəndlərdən də valideynlər müraciət edir.

Sonda qayğıya görə Fond rəhbərliyinə minnətdarlıq bildirlib.

Leyla Əliyeva həmçinin Şamaxı və Ağsuda bir sıra ailələri də ziyarət edib.