Gələcək nəsillərin sağlam böyüməsi və yoluxucu xəstəliklərdən etibarlı qorunması məqsədilə ölkə üzrə profilaktik tədbirlər uğurla davam etdirilir.

Azmedinfo.az xəbər verir ki, bu çərçivədə Tibbi Ərazi Bölmələrini İdarəetmə Birliyi (TƏBİB) tərəfindən təsdiq edilmiş İmmunizasiya üzrə Tədbirlər Planına əsasən, avqustun 1–15-i tarixlərində 11 min 504 uşağa ümumilikdə 15 min 893 doza peyvənd tətbiq olunub.

İlkin səhiyyə müəssisələrində uşaqların immunizasiya vəziyyəti fərdi şəkildə qiymətləndirilir, peyvənddən kənarda qalmış və ya natamam peyvəndlənmiş azyaşlılar müəyyənləşdirilir, valideynlər maarifləndirilərək peyvəndlərin təqvimə uyğun tamamlanması təmin edilir.

Prosesin yüksək peşəkarlıqla həyata keçirilməsi məqsədilə iyulun 15–31-i aralığında təşkil edilən xüsusi təlimlərdə isə ümumilikdə 1435 tibb işçisi iştirak edərək bilik və bacarıqlarını artırıb.