Musiqi yalnız əhval-ruhiyyəni qaldırmaqla kifayətlənmir, həm də ürək-damar sisteminin fəaliyyətinə birbaşa təsir göstərə bilir.

Azmedinfo.az xəbər verir ki, bu barədə Avropa Kardioloqlar Cəmiyyətinin saytında (escardio.org) məlumat verilib.

Yeni tədqiqat göstərib ki, qan təzyiqi ən yaxşı şəkildə musiqi frazalarının strukturunun proqnozlaşdırıla bildiyi əsərlərlə sinxronlaşır. Alimlərin nəticələri gələcəkdə ürək-damar xəstəliklərinin profilaktikası üçün fərdiləşdirilmiş musiqi terapiyalarının yaradılmasına imkan açır.

Eksperimentdə 92 nəfər iştirak edib. Onlara 30 fortepiano əsərindən seçilmiş 9-u dinlədilib və bu zaman təzyiq real vaxt rejimində qeydə alınıb.

Ən güclü təsiri Harold Bauerin ifasında, Ferenc Listin işləməsində Frants Şubertin “Serenadası” göstərib.

Məhz bu əsərin aydın və proqnozlaşdırıla bilən quruluşu dinləyicilərin təzyiqi ilə daha çox uyğunluq yaradıb.