İşğaldan azad olunmuş ərazilərdə səhiyyə xidmətlərinin gücləndirilməsi məqsədilə Səhiyyə Nazirliyi ardıcıl tədbirlər həyata keçirir.

Azmedinfo.az xəbər verir ki, bu istiqamətdə “Böyük Qayıdış” proqramı çərçivəsində kompleks tibbi müayinələr və sağlam həyat tərzini təşviq edən maarifləndirici aksiyalar davam etdirilir.

Avqustun 29-da belə tədbirlərdən biri Füzuli şəhərində baş tutub. Aksiyanın təşkilatçısı Səhiyyə Nazirliyi, icrasında isə Azərbaycan Tibb Universitetinin Tədris Stomatoloji Klinikasının həkim briqadası iştirak edib. Müayinələr həm yerli sakinləri, həm də Qarabağın bərpasında çalışan mütəxəssisləri əhatə edib.

Tədbirin əsas məqsədi əhalinin ağız boşluğunun ümumi vəziyyətini qiymətləndirmək, stomatoloji xəstəlikləri erkən mərhələdə aşkarlamaq, profilaktik tədbirlər görmək və məsləhətçi tibbi xidmətlər təqdim etmək olub.

ATU-nun Tədris Stomatoloji Klinikasının direktoru İmran Ağayevin rəhbərliyi ilə stomatoloq-terapevt, ortodont, ortoped, cərrah və uşaq stomatoloqundan ibarət mütəxəssis heyəti ətraflı müayinələr aparıb.

Aksiya çərçivəsində ümumilikdə 100-dən çox vətəndaş tibbi müayinədən keçib. Qeyd edək ki, Səhiyyə Nazirliyi “Böyük Qayıdış” proqramına dəstək məqsədilə digər azad edilmiş bölgələrdə də bu cür tibbi və maarifləndirici tədbirləri davam etdirir.