Ürəyin mitral qapağının dəyişdirilməsi ürək-damar cərrahiyyəsində ən vacib əməliyyatlardan biridir. Bu müdaxilə əsasən mitral qapağın daralması (stenozu) və ya qapanmaması (çatışmazlığı) nəticəsində ürəyin nasos funksiyasının pozulduğu hallarda həyata keçirilir. Müalicə olunmadıqda belə patologiyalar xəstədə nəfəs darlığı, ödem, ritm pozğunluğu və ağır ürək çatışmazlığına səbəb ola bilər.

Azmedinfo.az xəbər verir ki, İcbari Tibbi Sığorta üzrə Dövlət Agentliyinin təminat zərfi çərçivəsində artıq bu əməliyyat da dövlət hesabına qarşılanır. Bu, maddi imkanı məhdud olan pasiyentlər üçün böyük dəstəkdir və onların vaxtında müalicə almasına şərait yaradır.

Əməliyyat zamanı zədələnmiş mitral qapaq mexaniki və ya bioloji protezlə əvəz olunur. Hansı protezin seçilməsi xəstənin yaşı, yanaşı xəstəlikləri və həyat tərzi nəzərə alınmaqla həkim tərəfindən müəyyən edilir. Əməliyyatdan sonra pasiyentlər mütəmadi həkim nəzarətində olmalı, reabilitasiya proqramına və dərman təyinlərinə ciddi əməl etməlidirlər.

Ürək-damar xəstəliklərinin vaxtında aşkarlanması, erkən müayinə və profilaktik tədbirlər gələcəkdə belə mürəkkəb cərrahi müdaxilələrin qarşısını almaqda mühüm rol oynayır.