Onikibarmaq bağırsaq xorası çoxfaktorlu xəstəlikdir və hər bir insanda fərqli klinik gedişata malik ola bilər.

Azmedinfo.az xəbər verir ki, qastroenteroloq, hepatoloq, invaziv endoskopist Dr. Aqil Ağakişiyev ən çox müşahidə olunan səbəbləri sadalayıb:

Helikobakter pilori infeksiyasına səbəb olan bakteriya mədə və onikibarmaq bağırsağın selikli qişasında iltihab yaradır, turşu ifrazını artırır və qoruyucu baryeri zədələyərək xoraların formalaşmasına gətirib çıxarır.

Bundan əlavə, qeyri-steroid iltihabəleyhinə preparatlar (NSAİİ), yəni ağrıkəsici və iltihabəleyhinə dərmanların uzunmüddətli qəbulu selikli qişanı zəiflədir və turşunun zərərverici təsirini gücləndirərək xora riskini artırır.

Stres və həyat tərzi faktorları, xroniki gərginlik, siqaret, alkoqol istifadəsi, qeyri-müntəzəm və zərərli qidalanma da bu xəstəliyin inkişafını sürətləndirən əsas amillərdəndir.

Vaxtında müalicə olunmayan onikibarmaq bağırsaq xorası ciddi fəsadlara – daxili qanaxmalara və hətta bağırsaq perforasiyasına səbəb ola bilər.

Həkim qeyd edib ki, bu səbəbdən, profilaktika məqsədilə sağlam həyat tərzi, düzgün qidalanma və həkim nəzarəti vacibdir.