Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyeva, eləcə də Bakı Media Mərkəzinin rəhbəri Arzu Əliyeva Bilgəhdə təşkil olunan sahil təmizliyi aksiyasında iştirak ediblər.

Azmedinfo.az xəbər verir ki, IDEA İctimai Birliyinin təşəbbüsü ilə keçirilən tədbirə yüzdən artıq könüllü qoşulub. İməcilik zamanı toplanmış təxminən beş ton tullantı “Təmiz Şəhər” ASC-nin Balaxanı bərk məişət tullantılarının çeşidlənməsi zavoduna göndərilib.

Aksiyanın keçirilməsində əsas məqsəd dəniz sahillərində ekoloji mədəniyyətin gücləndirilməsi, təmizlik qaydalarına əməl olunmasının təşviqi və ictimaiyyətin dəniz ətrafı mühitin qorunmasına daha fəal şəkildə cəlb edilməsidir.

Xatırladaq ki, IDEA İctimai Birliyi uzun müddətdir Xəzər dənizi və Qafqaz regionunun digər su hövzələrinin biomüxtəlifliyinin mühafizəsi üçün sahilyanı ərazilərdə təmizlik və bərpa yönümlü davamlı layihələr icra edir.

Birlik həmçinin vətəndaşlara müraciət edərək çimərliklərdə istirahət zamanı ətraf mühitin qorunmasına xüsusi diqqət göstərməyə, tullantıları ətrafa atmaqdan çəkinməyə və təbiətə qarşı daha məsuliyyətli münasibət sərgiləməyə çağırır.

Leyla Əliyeva və Arzu Əliyeva aksiya ilə bağlı öz sosial şəbəkə səhifələrində də paylaşım ediblər.