ABŞ-ın UMass Memorial Health Massachusets xəstəxanasının əməkdaşları məcburi vaksinasiya tələbinə etiraz olaraq nümayiş keçiriblər.

Azmedinfo.az xəbər verir ki, bu barədə "Pravda" nəşri məlumat yayıb. Bildirilir ki, ştatdakı səhiyyə işçiləri üçün peyvənd olunma üzrə son müddət yaxınlaşır. Onlar 1 noyabra qədər COVID-19 peyvəndi qəbul etməli və ya tibbi göstərişlə vaksinasiya istisnası almalıdırlar, əks halda işdən azad olunacaqlar.

Xəstəxananın girişinə yaxın ərazidə 80-dən çox nümayişçi toplaşıb. Aksiyanın iştirakçıları bildiriblər ki, onlar peyvəndin əleyhinə deyillər, sadəcə seçim azadlığının tərəfdarıdırlar. Bəzi iştirakçılar həmçinin polis, dövlət qulluqçuları və peyvənd olunmağa məcbur edilən, lakin bunu istəməyən bütün insanlar üçün çıxış etdiklərini vurğulayıblar.

“Biz peyvəndlərin əleyhinə deyilik, ümumiyyətlə peyvəndlərə qarşı deyilik”, – deyə aksiyanın iştirakçısı Ceki Faşdjan bildirib. – “Biz sadəcə seçimin tərəfdarıyıq. Hesab edirik ki, hər birimiz orqanizmimizə daxil olan şeylər barədə sərbəst qərar verməliyik. Burada əsas məsələ seçim azadlığıdır. Bu prosesin hökumət tərəfindən məcburiyyət, şantaj və rüşvət vasitəsilə insanlara sırınması həmin azadlığı məhv edir”, – o əlavə edib.

UMass Memorial Health rəhbərliyi isə açıqlayıb ki, onların 16 500 əməkdaşından təxminən 90%-i artıq vaksin olunub.

Aksiyanın təşkilatçıları 31 oktyabrda daha genişmiqyaslı etirazın keçiriləcəyini bəyan ediblər.

CNN yazır ki, yeni bir araşdırmaya görə, COVID-19 vaksinasiya prosesini stimullaşdırmaq üçün təşkil edilən lotereyalar effektiv nəticə vermir.

Cümə günü JAMA Health Forum platformasında dərc olunan araşdırmada qeyd olunub ki, alimlər aprel ayının sonundan iyulun əvvəlinə qədər peyvənd olunanların iştirak etdiyi lotereyaların təşkil olunduğu 19 ABŞ ştatının məlumatlarını təhlil ediblər.

Araşdırma nəticəsində lotereyalarla peyvəndlənmə göstəriciləri arasında statistik cəhətdən əhəmiyyətli əlaqə aşkarlanmayıb.