Psixoloqların sözlərinə görə, ilk dəfə ata olan kişilərin beyni öz körpələri ilə ünsiyyət zamanı yad uşaqlar və ya partnyorla ünsiyyətdən daha güclü aktivləşir. Bu, ata ilə uşaq arasında bağlılığın formalaşması və tərbiyə prosesindəki stresslə əlaqələndirilir.

Azmedinfo.az xəbər verir ki, bununla bağlı "Human Brain Mapping" jurnalında dərc olunan tədqiqatda bəhs edilir.

Körpələrin üz cizgiləri — baş, iri gözlər, dolğun yanaqlar və kiçik çənə — böyüklərdə instinktiv qayğı hissi oyadır. Əvvəlki araşdırmalarda göstərilmişdi ki, analarda öz körpələri ilə ünsiyyət zamanı emosiyalar, sosial idrak və hissləri ilə bağlı beyin sahələri aktivləşir. Atalar isə daha az öyrənilmişdi.

Tədqiqat çərçivəsində Los-Anceles bölgəsindən 32 yeni ata öz körpələrinin, yad uşağın, hamilə partnyorlarının və yad qadının beş saniyəlik videolarına baxıblar.

MRT nəticələri göstərib ki, öz körpəsini izləyən ataların beynində preklyuniya, arxa singulat, dorsomedial və ön prefrontal qabıq, sol temporal pol, orbitofrontal qabıq və digər sahələr daha güclü aktivləşib.

Öz körpəsinə və partnyora reaksiyanın müqayisəsi göstərib ki, preklyuniya, klyuniya, arxa singulat və orta oksipital qırış aktivləşir. Bu sahələrin aktivliyi bağlılıqla müsbət, stress və tərbiyədəki çətinliklərlə isə mənfi əlaqələnib.

Araşdırma nəticəsində məlum olub ki, ilk dəfə ata olan kişilərdə sosial idrak, vizual qavrayış və mükafatlandırma ilə bağlı beyin sahələri övladlarına reaksiyada mühüm rol oynayır və onların aktivliyi atalıq prosesinə adaptasiya və stress səviyyəsi ilə sıx bağlıdır.