Emili Smit onu xilas edən yad insanı tanımır. Amma balaca oğlu Hadsonu hər dəfə qucağına alanda bu möcüzəvi hədiyyə üçün sonsuz minnətdarlıq hissi keçirir. “Oğlum anasını hələ də yanında görürsə, bu, bir yad insanın mərhəməti sayəsindədir,” – deyə o vurğulayır.

Azmedinfo.az orqan donorluğu ilə bağlı maarifləndirici hekayəni təqdim edir.

Hadsonu dünyaya gətirdikdən cəmi altı həftə sonra, 26 yaşlı gənc ananın həyatı alt-üst oldu. Ona təcili olaraq yeni ürək lazım idi. Həkimlər Emiliyə transplantasiya siyahısında təcili status verdilər.

Şans onun üzünə güldü və cəmi bir həftə yarımdan sonra tam uyğun donor ürəyi tapıldı. Əməliyyat uğurla həyata keçirildi – köhnə ürək çıxarılaraq yenisi ilə əvəz olundu.

Cəmi iki həftə sonra xəstəxanadan evə buraxılan Emili ikinci həyat şansı qazandığı üçün özünü xoşbəxt hesab edir.

Bu gün o, orqan donorluğunun fəal tərəfdarına çevrilib: “Orqan donorluğu – yaşamaq şansı, ana olmaq, sevdiklərini yenidən qucaqlamaq deməkdir. Mənə və ailəmə yeni həyat bəxş edən həmin insana minnətdarlığımı sözlə ifadə edə bilmirəm.”

Bəlkə sizin mərhəmətiniz də kiminsə sabahını xilas edəcək. Donor olmaqla, yalnız bir ürək deyil, bütöv bir həyat bəxş edə bilərsiniz.

Orqan Donorluğu və Transplantasiyası üzrə Koordinasiya Mərkəzi