“Ceyms Uebb” kosmik teleskopu Uranın indiyədək məlum olmayan peykini qeydə alıb — bu, sayca 29-cu peykdir. Onun diametri cəmi 10 kilometrə yaxındır. Lakin alimlərin ehtimalına görə, çox qədimdir — böyük ehtimalla, yaranışı öz planeti ilə, diametri təxminən 51 min kilometr olan buz nəhəngi ilə eyni vaxta təsadüf edir. Görünür, kiçik ölçülərinə görə Uranın 29-cu peykini 40 il əvvəl oradan keçən “Voyager 2” görməyib.

Azmedinfo.az "Realnoe Vremya"ya istinadən xəbər verir ki, Günəş sistemindəki nəhəng planetlərin (Uran, Yupiter və Saturn) peykləri hələ də tapılır və bu sahədə yeni kəşflər mütəmadi olaraq edilir. Böyük peyklər artıq kəşf edilib, lakin kiçikləri ard-arda üzə çıxır. Saturn bu baxımdan rekordçudur: hazırda 274 peyki məlumdur, onların arasında tək sıx atmosferə malik olan Tитан da var. Maraqlıdır ki, Saturnun peyklərinin demək olar ki, yarısı — 128-i astronomlar tərəfindən cəmi bir neçə ay əvvəl, 2025-ci ilin martında aşkar edilib. Yupiterin isə hazırda 95 peyki tanınıb. Uran 29 peyklə hələlik “bürünc” mövqedədir.

Uranın yeni peyki hələlik ad almayıb — yalnız şərti olaraq S/2025 U1 kimi qeyd olunur. Çox güman ki, bu peyk də planetin digər peykləri kimi Şekspir və ya Poupun əsərlərindəki qəhrəmanların adı ilə adlandırılacaq. O, Uranın ekvatoru ətrafında demək olar ki, dairəvi orbitlə hərəkət edir və Ofeliya ilə Biyanka peyklərinin orbitləri arasında yerləşir.

Müasir astrobiologiya sahəsində aparılan araşdırmalar göstərir ki, Günəş sistemində həyat üçün ən əlverişli şərtlər bəzi peyklərdə mövcud ola bilər. Yeni kəşf edilən peykin diametri cəmi 10 kilometrə yaxındır. Bu qədər kiçik ölçülü bir göy cisminin özünə stabil bir atmosfer saxlamaq ehtimalı çox azdır. Bundan əlavə, Uran və Saturn kimi nəhəng planetlər əsasən qaz və buz nəhəngləridir. Onların peykləri də əsasən buzdan və qayalardan ibarət olur.