Həkim və teleaparıcı Aleksandr Myasnikov yaxın beş ildə infarkt və ya insult riskini artıran əlamətləri sadalayıb.

Azmedinfo.az verilişin buraxılışının yayımlandığı “Smotrim” platformasına istinadən yazır ki, həkim bu barədə fikri studiyaya gələn tamaşaçılardan birinin analiz nəticələrini həkimə təqdim edərkən bildirib.

“Artıq çəki, hipertonya və prediabet ürək xəstəlikləri üçün güclü risk faktorlarıdır. Siz öz sağlamlığınızla ciddi məşğul olmalısınız”, – deyə Myasnikov proqram iştirakçısına müraciət edib.

Bildirib ki, artıq çəki orqanizmdə maddələr mübadiləsini pozur, şəkər və yağ balansını dəyişir, nəticədə damarların divarında xolesterin yığılmasını sürətləndirir. Hipertonya isə ürək əzələsini və damar divarlarını davamlı gərginlikdə saxlayaraq vaxtından əvvəl köhnəlməyə səbəb olur. Prediabetin varlığı isə qan şəkərinin qeyri-sabitliyini göstərir və bu, həm sinir sisteminə, həm də qan damarlarının sağlamlığına ciddi mənfi təsir göstərir.

Həkim pasiyentdə aparılan müayinələrin nəticələrinə diqqət çəkərək, “pis” xolesterin kimi tanınan aşağı sıxlıqlı lipoproteinlərin (AŞLP) normadan xeyli yüksək olduğunu vurğulayıb. Bu göstərici, həkimin sözlərinə görə, aterosklerozun inkişafına səbəb olur, yəni damarların içində yağ təbəqələrinin toplanması ilə onların elastikliyini azaldır və qan axınını çətinləşdirir. Bu vəziyyət isə yaxın beş ildə infarkt və ya insult kimi həyati təhlükəli fəsadların başvermə riskini xeyli artırır.

O, qadının vəziyyətinin kifayət qədər ciddi olduğunu qeyd edərək yalnız həyat tərzi dəyişikliyinin deyil, həm də dərman müalicəsinin vacibliyini önə çəkib. Xüsusən də yüksək dozada statinlərin qəbulu xolesterin səviyyəsini nəzarət altına almağa, damarların qorunmasına və ürək-damar xəstəliklərinin qarşısının alınmasına kömək edə bilər. Həkim əlavə edib ki, vaxtında görülən tədbirlər sağlamlıq üçün dönüş nöqtəsi ola bilər və gələcəkdə ağır nəticələrin qarşısını almağa imkan verər.