Tez-tez sidiyə getmək sadəcə narahatlıq deyil, gündəlik həyat keyfiyyətinə də ciddi təsir göstərə bilər. Bu hal insanın səyahət etməsini, sosial münasibətlərini və hətta iş fəaliyyətini məhdudlaşdıra bilir.

Azmedinfo.az xəbər verir ki, uroloq, androloq Emin Məmmədovun sözlərinə görə, bu vəziyyətin müxtəlif səbəbləri ola bilər.

Ən sadə səbəblərdən biri həddindən artıq maye qəbuludur. Su ilə yanaşı, kofein və alkoqol kimi diuretik təsir göstərən içkilər də böyrəkləri yükləyərək sidik istehsalını artırır. Bundan başqa, sidik yolları infeksiyaları da tez-tez sidiyə getmənin ən geniş yayılmış səbəblərindəndir. Belə hallarda sidik ifrazı zamanı yanma, bulanıq sidik, qızdırma və bel ağrısı müşahidə oluna bilər.

Hiperaktiv sidik kisəsi və müəyyən qida-içkilərin yaratdığı qıcıqlanma da səbəblər arasında yer alır. Kofein, alkoqol, acılı yeməklər və sitrus şirələri sidik kisəsini qıcıqlandıraraq tualetə getmə ehtiyacını artırır. Kişilərdə isə prostatın böyüməsi (BPH) tez-tez sidiyə getmənin əsas faktorlarından biridir.

Şəkərli diabet də diqqətdən kənarda qalmamalıdır. Yüksək qan şəkəri qlükozanın sidiklə ifrazına, bununla da daha çox suyun bədəndən çıxmasına səbəb olur. Hamiləlik dövründə hormonal dəyişikliklər və uşaqlığın böyüməsi də sidiyə getmə ehtiyacını artırır. Bundan əlavə, bəzi dərmanlar, xüsusilə diuretiklər, bu prosesi gücləndirə bilər.

Mütəxəssislər xəbərdarlıq edirlər ki, tez-tez sidiyə getmə bəzi hallarda ciddi xəstəliklərin əlaməti ola bilər. Ağrı, sidikdə qan, daimi qızdırma və digər əlavə simptomlar müşahidə olunursa, vaxt itirmədən həkimə müraciət edilməlidir.

Qeyd edək ki, bu məlumat maarifləndirmə xarakteri daşıyır və tibbi məsləhət əvəzi deyil. Sağlamlıqla bağlı hər hansı narahatlıq zamanı mütləq mütəxəssis rəyi alınmalıdır.