STTT: GPR133 reseptoru sümük böyüməsinə cavabdeh hüceyrələrin fəaliyyətini gücləndirir

Alimlər osteoporozun müalicəsi üçün perspektivli hədəf kəşf ediblər. Bu sümük toxumasının formalaşmasını tənzimləyən GPR133 reseptorudur.

Azmedinfo.az xəbər verir ki, "Signal Transduction and Targeted Therapy" jurnalında dərc olunmuş iş göstərib ki, bu reseptorun aktivləşdirilməsi sümük böyüməsinə cavabdeh hüceyrələrin — osteoblastların fəaliyyətini artırır və hətta ağır pozuntular zamanı onların quruluşunu bərpa etməyə kömək edir.

Siçanlar üzərində aparılan təcrübələr göstərib ki, GPR133 geninin bloklanması sümük sıxlığının azalmasına və osteoporoz əlamətlərinin yaranmasına səbəb olur. Əksinə, reseptorun yeni birləşmə AP503 ilə stimullaşdırılması sümük toxumasının yaranmasını gücləndirib və postmenopauzal osteoporoz modelində skeletin dağılmasının qarşısını alıb.

Təsir mexanizmi sümük böyüməsi və yenilənməsində mühüm rol oynayan beta-katenin siqnal yolunun aktivləşməsi ilə bağlı olub. Bundan əlavə, alimlər müəyyən ediblər ki, reseptorun işinə fiziki aktivlik kimi mexaniki yüklənmə də təsir edir.

Mütəxəssislər hesab edirlər ki, GPR133 əsasında osteoporoza qarşı təhlükəsiz və uzunmüddətli preparatlar hazırlamaq mümkündür. Yeni yanaşma yalnız sümüklərin dağıntısını ləngitməyə deyil, həm də onların bərpası proseslərini işə salmağa imkan verəcək.