AHA: Yoga idrak funksiyalarının yaşla zəifləməsini ləngidir

Yoga yalnız stressin azaldılması üçün deyil, həm də beyin sağlamlığı üçün faydalı ola bilər.

Azmedinfo.az "American Heart Association"nın məlumatına istinadən yazır ki, alimlərin fikrincə, müntəzəm yoga praktikası iltihabı azaldır, yaddaşı yaxşılaşdırır və idrak funksiyalarının yaşla zəifləməsini ləngidir, bununla da demensiya riskini azaldır.

Mütəxəssislər qeyd edirlər ki, yoga kompleks təsir göstərir: fiziki hərəkətləri, nəfəs məşqlərini və meditasiya texnikalarını birləşdirir. Bu yanaşma beynin stressi daha yaxşı idarə etməsinə və bədənin sinir sistemi ilə əlaqəsini dəstəkləməsinə kömək edir. Aparılan müqayisələrdə yogayla məşğul olan qadınlarda yaddaş və düşüncəyə cavabdeh beyin sahələrində boz maddə daha çox olub və idrak aktivliyi daha yüksək müşahidə edilib.

Xüsusilə perspektivli istiqamət menopauzadan sonrakı qadınlarda kundalini-yoganın beyin sağlamlığına təsirinin öyrənilməsi olub. Aydınlaşıb ki, bu praktika boz maddəni qoruyur və icraedici yaddaş funksiyalarını ənənəvi beyin məşqlərindən daha effektiv yaxşılaşdırır.

Yoga həm də yaşlı insanlar və xroniki xəstəliklərdən əziyyət çəkənlər üçün intensiv fiziki fəaliyyətə əlçatan alternativ hesab olunur. Mütəxəssislərin fikrincə, faydanın qorunması üçün yoga ilə həftədə ən azı 2–3 dəfə müntəzəm məşğul olmaq lazımdır, əks halda təsir tədricən azalır.