Dünyada piylənmə hallarının artmasının qeyri-aşkar səbəblərindən biri kimi "Nature Climate Change" (NCC) jurnalı qlobal istiləşməni göstərib. Mütəxəssislərin fikrincə, bu amil risk faktorlarından biridir. Onlar izah edirlər ki, isti günlərdə insanlar daha çox şəkərli içkilər, şirələr və yüksək şəkər tərkibli dondurma alırlar.

Azmedinfo.az jurnala istinadən yazır ki, alimlər 2017–2018-ci illər üzrə ABŞ supermarketlərində alış-veriş tələbinin məlumatlarını təhlil ediblər. Hesablamalar göstərib ki, 12 °C-dən aşağı temperaturda əlavə şəkər istifadəsi bir qədər artır. Lakin hər yeni bir dərəcə istiləşmə (12–30 °C intervalında) gündəlik rasiona əlavə 0,7 qram şəkərin daxil olması ilə nəticələnir.

Bu vəziyyətdən xüsusilə aşağı gəlirli insanlar əziyyət çəkirlər, çünki onların sağlam qidalara çıxışı məhduddur. Əgər iqlim indiki sürətlə pisləşməyə davam edərsə, əsrin sonuna qədər ən həssas təbəqələrin gündəlik şəkər qəbulu əlavə 5 qram artacaq. Bu isə piylənmə, şəkərli diabet və ürək-damar xəstəlikləri riskini ciddi şəkildə gücləndirəcək.

Bundan əlavə, tədqiqat müəllifləri bildirirlər ki, yüksələn temperatur səhiyyə sisteminə əlavə yük yaradır. Çünki artıq indi şəkər piylənmənin və onun fəsadlarının əsas səbəblərindən birinə çevrilib.