Yaxşıxassəli törəmələr çox vaxt poliplər olur, yavaş böyüyürlər. Amma zamanla ciddi problemə çevrilə bilirlər.

Azmedinfo.az xəbər verir ki, bu barədə tibb üzrə fəlsəfə doktoru, qastroenteroloq və hepatoloq Sergey Vyalov öz “Telegram” kanalında yazıb.

Həkim bildirib ki, hiperplastik poliplər adətən zərərsizdir, amma adenomatöz poliplər narahatlıq doğurmalıdır, çünki cəmi beş ildən sonra xərçəngə çevrilə bilirlər.

Bəzi hallarda bu proses 10–15 il çəkir. Ancaq qidalanmada yol verilən səhvlər prosesi sürətləndirir. Təhlükəli törəmələrin böyüməsini dayandırmaq və onların yaranmasının qarşısını almaq üçün qızardılmış qırmızı ət, “fast food”, qazlı içkilər və zərərli karbohidratlardan imtina etmək lazımdır.

İltihabı azaltmaq üçün qidalanmaya balıq, kətan yağı, zərdəçal əlavə etmək, mikrofloranı bərpa etmək üçün isə lif və probiotiklərdən (brokoli, giləmeyvə, kələm turşusu) istifadə tövsiyə olunur.

Həkimin sözlərinə görə, iltihab, poliplər, divertikullar və nəticədə xərçəng “çirkli bağırsaqda” inkişaf edir. Bu isə, o cümlədən, lif çatışmazlığı ilə bağlıdır.

Sergey Vyalov xatırladır ki, təhlükəli poliplər kolonoskopiya zamanı aşkarlanır və çıxarılır. Buna görə də bu diaqnostika üsuluna laqeyd yanaşmaq olmaz. Daha müasir variantlar da var – məsələn, KT-kolonqrafiya və kapsul endoskopiya.