Oral xərçəng dediyimiz xəstəliklər çox sürətli və gizli şəkildə inkişaf edir. Buna görə də xəstələrin ağız boşluğunda 2 həftədən uzun davam edən yaraları varsa, mütləq yaxınlıqdakı diş həkiminə müraciət etmələri vacibdir.

Azmedinfo.az "TV24"ə istinadən yazır ki, bu sözləri Samsun Ondokuz Mayıs Universiteti (OMÜ) Diş Həkimliyi Fakültəsinin dekanı prof. Dr. Kaan Gündüz bildirib.

Professor qeyd edib ki, Səhiyyə Nazirliyinin 2022-ci ildə apardığı son araşdırmada 2246 ağız xərçəngi hadisəsi aşkarlanıb. Bu hallardan 551-i ölümlə nəticələnib.

Həkimin sözlərinə görə, vətəndaşlar çox vaxt ağızdakı yaralara əhəmiyyət vermir. Tütün istifadəsi, zəif ağız baxımı, günəşə məruz qalma və HPV virusu ağız xərçənginin artışında mühüm rol oynayır. Ağızda 2 həftədən uzun davam edən yaralar, keylik və çənə ağrıları mütləq nəzərə alınmalıdır.

Professor əlavə edib ki, ağız xərçəngindən qorunma yolları arasında tütün və alkoqol istifadəsinin azaldılması ön plandadır. Ertələnmədən diaqnoz qoyulması ölüm hallarının qarşısını ala bilər.

“Xərçəngin ən çox əmələ gəldiyi yerlər ağız boşluğunda dilin arxa kənarlarıdır. Təəssüf ki, başlanğıcda ağrısız olduqları üçün bu yaralar çox vaxt gözdən qaçırılır. İnsanlar diqqətli olmalı, əgər belə bir lezyon görsələr, şəkil çəkdirib 2 həftə sonra təkrar müqayisə etməlidirlər. Əgər yara qalırsa və ya böyüyürsə, təcili həkimə müraciət etməlidirlər”, - deyə professor bildirib.

O həmçinin qey edib ki ağız xərçəngindən qorunmanın ən qısa yolu tütün və alkoqoldan uzaq durmaqdır. Son illərdə HPV virusunun həm uşaqlıq boynu, həm də ağız xərçənglərində rol oynadığı sübut olunub. Uyğun yaşlarda aparılan peyvəndlər qismən qoruyuculuq təmin edir. Amma ən əsası – təhlükəsiz cinsi münasibət və vaxtında peyvənd olunmaqdır.

"Diş xərçəngi deyilən bir şey yoxdur. Oral xərçəng dediyimiz zaman dodaqlar deyil, diş ətləri, yumşaq və sərt damaq nəzərdə tutulur. Onların vərəm və ya hepatit kimi yoluxma riski yoxdur. Yəni xəstəlik yalnız fərdin özündə inkişaf edir, ya sağalır, ya da təəssüf ki, ölümlə nəticələnir", - həkim vurğulayıb.