Disfagiya, yəni udma çətinliyi, qatı və ya maye qidaların udulmasında problemlə xarakterizə olunan tibbi vəziyyətdir.

Azmedinfo.az xəbər verir ki, qastroenteroloq, hepatoloq və invaziv endoskopist Dr. Aqil Ağakişiyevin sözlərinə görə, bu hal bir çox ciddi xəstəliyin, o cümlədən insult, nevroloji xəstəliklər (Parkinson, dağınıq skleroz), qida borusunun daralması, reflüks, şişlər və travmaların nəticəsi kimi yarana bilər. Disfagiyanın əlamətləri də fərqli şəkildə özünü göstərir. Bu simptomlara qidanın boğazda qaldığı hissi, udarkən yaranan öskürək və boğulma, nəfəs almaqda çətinlik, çəki itkisi, hətta bəzən qidanın burundan gəlməsi də daxildir.

Disfagiya, udma prosesinin hansı mərhələsində problem yaranmasından asılı olaraq, üç əsas növə ayrılır. Oral disfagiya qidanın ağız boşluğunda çeynənməsi ilə bağlı yaranan çətinlikdir. Faringeal disfagiya qidanın boğaz hissəsindən keçməsində, ezofageal disfagiya isə qida borusundan keçməsində yaranan problemlərlə əlaqədardır.

Həkim qeyd edib ki, bu vəziyyətin səbəbləri müxtəlif ola bilər. Belə ki, udlaq və qida borusunun travmatik və ya iltihabi xəstəlikləri, udma aktında iştirak edən əzələlərin və ya sinir sisteminin zədələnməsi, qida borusunun selikli qişasının yanıq və ya iltihab nəticəsində zədələnməsi, həmçinin qida borusunun və ya orta divarın şişləri, böyümüş limfa düyünləri disfagiyanın əsas səbəbləri arasında yer alır.

Dr. Aqil Ağakişiyev əlavə edib ki, bu cür əlamətlərlə qarşılaşan hər kəs vaxt itirmədən mütəxəssisə müraciət etməlidir. Erkən diaqnoz və düzgün müalicə planının təyin edilməsi pasiyentin həyat keyfiyyətini yüksəltmək və daha ciddi fəsadların qarşısını almaq üçün böyük əhəmiyyət kəsb edir.