Yeni Klinika

Yeni Klinika "Kiçik ürəklərin böyük ümidləri naminə" şüarı ilə seminara ev sahibliyi etdi

19 Sentyabr 2025

404

TƏBİB-in təşkilatçılığı ilə Yeni Klinikada “Neonatal xidmətdə yeni çağırışlar” adlı seminar keçirilib.

Azmedinfo.az xəbər verir ki, “Kiçik ürəklərin böyük ümidləri naminə!” şüarı ilə baş tutan tədbirdə doğuşayardım xidməti göstərən tibb müəssisələrində neonatal xidmətə cavabdeh şəxslər iştirak edib.

TƏBİB-in İxtisaslı tibbi xidmətin təşkili departamentinin Ana və uşaq sağlamlığı şöbəsinin Doğuşayardım Komissiyası ilə birgə keçirdiyi seminara qurumun İcraçı direktorunun müavini Anar İsrafilov sədrlik edib.

Açılış nitqi ilə çıxış edən A.İsrafilov ana və uşaq ölümü göstəricilərinin səhiyyənin prioritet istiqamətlərində biri olduğunu bildirib və sahə üzrə qüsurların aradan qaldırılması, təxirəsalınmaz addımların atılması ilə yanaşı yeniliklərin həyata keçirilməsinin vacibliyindən danışıb.

TƏBİB-in İxtisaslı tibbi xidmətlərin təşkili departamentinin rəhbəri Nəzrin Mustafayeva neonatal ölümlərin azaldılmasında problemlərin təhlilinin effektiv metodlardan biri olduğunu qeyd edib. N.Mustafayeva neonatologiyada təxliyələrin azaldılması, düzgün və professional yardımın yerində təşkilinin gücləndirilməsi, müəssisə rəhbəri tərəfindən hesabatlılığın təmin edilməsi ilə bağlı tövsiyələrini bildirib.

Respublika Pediatriya Mərkəzinin baş həkimi Emil Nuriyev “Neonatologiyada tənəffüs problemləri: risk faktorları, klinik yanaşma, müasir müalicə metodları” adlı məruzə ilə çıxış edərək, yenidoğulmuşların tənəffüs sistemindəki problemlərindən, risk faktorlarından danışıb.

Sumqayıt Tibb Mərkəzinin nəzdində olan Sumqayıt Perinatal Mərkəzinin Yenidoğulmuşların reanimasiya və intensiv terapiya şöbəsinin müdiri Yeganə Ağayeva “Neonatologiyada təxliyə: təhlükəsiz təxliyənin təşkili qaydaları” mövzusunda çıxış edib və yenidoğulmuşların müəssisələrarası təxliyəsi zamanı diqqət edilməli məqamlardan söz açıb.

TƏBİB-in İxtisaslı tibbi xidmətlərin təşkili departamentinin əməkdaşı Vəfa Hacıyeva “Neonatal skrininqlər: gələcəyimizin genetik sağlamlığı” adlı məruzə ilə çıxış edərək ölkəmizdə skrininqlərin aparılmasının vacibliyi, genetik xəstəliklərin erkən diaqnozu və müalicəsinin faydaları haqqında tədbir iştirakçılarını məlumatlandırıb.

Yeni Klinikanın Yenidoğulmuşların reanimasiya və intensiv terapiya şöbəsinin həkimi Könül Əliyeva “Yenidoğulmuş dövrdə sarılıq: risklər, idarəetmə və nəticələr” adlı məruzə ilə çıxış edib. O, yenidoğulmuşların ən çox qarşılaşdığı problemlərdən biri olan hiperbilirubinemiyanın əmələ gəlmə səbəbləri, növləri və müalicə metodları barədə danışıb.

100-ə yaxın tibb işçisinin qatıldığı seminarda tibb müəssisələrinin hər birinə 6 mövzu üzrə yenilənmiş milli klinik protokol nümunələrindən ibarət toplu təqdim edilib.

Tədbirin sonunda vaxtından əvvəl doğulmuş körpələri keyfiyyətli yaşatma göstəricilərinə əsasən Sumqayıt Perinatal Mərkəz, Respublika Pediatriya Mərkəzi və Yeni Klinikanın aidiyyəti komandalarına “Xilaskar komanda” adlı təşəkkürnamələr təqdim edilib. Təşəkkürnamə Yeni Klinikanın Yenidoğulmuşların reanimasiya və intensiv terapiya şöbəsinin adından həkim-neonatoloq Könül Əliyeva tərəfindən qəbul olunub.

TƏBİB