Rəsul Rəhimlinin həyat hədiyyəsi: uğurlu sümük iliyi nəqli

19 Sentyabr 2025

294

Rəsul Rəhimlinin həyat hədiyyəsi: uğurlu sümük iliyi nəqli

20 sentyabr – Dünya Sümük İliyi (Kök Hüceyrə) Donoru Günüdür. Dünyada milyonlarla donor öz hematopoetik kök hüceyrələrini ehtiyacı olan insanlara bağışlayaraq onlara ikinci həyat hədiyyə edirlər.

Azmedinfo.az xəbər verir ki, həyat hədiyyəsi alanlardan biri də Biləsuvar rayon sakini, 19 yaşlı kollec tələbəsi Rəsul Rəhimlidir. O illərlə Beta-talessemiya ilə mübarizə aparıb.

Rəsulun anası Könül xanım həmin çətin günləri belə xatırlayır:“4 yaşına qədər heç nə bilinmədi. Sonra halsızlıq, tez-tez tərləmə, qan azlığı başladı. Həkimlər Beta-talessemiya diaqnozu qoydular. Hər ay qan köçürülürdü, dəmirqovucular və vitaminlər verilirdi. Oğlum demək olar ki, xəstəxanalarda böyüdü.”

14 il boyunca hər ay qan köçürülüb. Həkimlər ailəyə bildiriblər ki, bu xəstəliyin yeganə qəti müalicəsi sümük iliyi nəqlidir.

Ailə Səhiyyə Nazirliyi Orqan Donorluğu və Transplantasiyası üzrə Koordinasiya Mərkəzinə müraciət edib, xəstə gözləmə siyahısına alınıb. Rəsulun yaxın qohumları arasında donor tapılmadığından Türkiyədə “TürkKök” Kök Hüceyrə bankına müraciət olunub. Və bir gün Koordinasiya Mərkəzindən zəng gəlib: “Uyğun donor tapılıb.”

2025-ci ilin yanvarında Rəsul Türkiyəyə yollanıb və sümük iliyi nəqli həyata keçirilib. İlkin sümük iliyi nəqli nəticə verməyib. Amma dövlət və Səhiyyə Nazirliyi ODTKM ailəni tək buraxmayıb. TürkKök bankından ikinci uyğun donor tapılıb və üç ay sonra əməliyyat təkrar olunub – bu dəfə uğurla başa çatıb.

Əməliyyat xərcləri, dərmanlar, həmçinin ailənin Türkiyədə qalması və qidalanması dövlət hesabına ödənilib. Bu, Azərbaycanın sümük iliyi transplantasiyası xidmətlərinin təkmilləşdirilməsi layihəsi çərçivəsində sümük iliyi nəqli həyata keçirilən onlarla uğurlu əməliyyatdan biridir.

Könül xanım minnətdarlıqla bildirir: “Dövlətimizin, Səhiyyə Nazirliyinin, Səhiyyə Nazirliyi ODTKM-nın böyük xidməti oldu. Biz tək deyildik. Bu dəstək olmasaydı, bu gün bura qədər gələ bilməzdik.”

Əməliyyatdan üç ay keçib və Rəsul özünü çox yaxşı hiss edir. O, əməliyyatı həyata keçirən həkimlərin adlarını xüsusi qeyd edir: “Zəfər doktor başda olmaqla bütün tibbi personal mənə həm motivasiya, həm də peşəkar dəstək verdi. Melis doktor, Damla doktor – hər biri yanımda oldular."

Rəsul eyni xəstəliyə düçar olan digər uşaqlara və gənclərə belə tövsiyə edir: “Burada əsas bədən sağlamlığı deyil, ruh sağlamlığıdır. Motivasiyanız nə qədər güclü olsa, bir o qədər tez sağalacaqsınız. Xəstəxanaya gələndə bir söz deməlisiniz: Mən bura gəldim, sağalıb çıxacam!”

Səhiyyə Nazirliyi Orqan Donorluğu və Transplantasiyası üzrə Koordinasiya Mərkəzinin İdarə Heyətinin sədri Yeganə Abbasova bildirir: "Sümük iliyi transplantasiyası xidmətlərinin təkmilləşdirilməsi layihəsi çərçivəsində Azərbaycandan onlarla xəstə sümük iliyi nəqli əməliyyatına göndərilib. Sümük iliyi transplantasiyası ciddi qan xəstəlikləri, talassemiya, aplastik anemiya və bəzi onkoloji xəstəliklərdə həyati əhəmiyyət daşıyır. Hər bir uğurlu transplantasiya xəstənin həyat keyfiyyətini əhəmiyyətli dərəcədə yaxşılaşdırır, ailələr üçün ümid işığı olur və ölkədə bu sahədə tibbi potensialın inkişafını göstərir."

Hazırda Dünya Sümük İliyi Donorları Assosiasiyasının (WMDA) məlumatına görə, dünyada 44 milyondan çox könüllü sümük iliyi və hematopoetik kök hüceyrə donoru qeydiyyatdadır. Bu, hər il minlərlə xəstənin həyatını xilas edən qlobal həmrəylik hərəkatıdır. Gəlin biz də donor olaraq daha çox həyata şans verək.

Orqan Donorluğu və Transplantasiyası üzrə Koordinasiya Mərkəzi