Nevroloq Anna Kopseva miqren tutmaları zamanı özünə necə kömək etmək barədə danışıb.

Azmedinfo.az “İzvestiya” portalına istinadən yazır ki, onun sözlərinə görə, miqren yalnız böyüklərdə deyil, həm də uşaqlarda müşahidə olunur. Tutmaların tezliyi və intensivliyi fərqlənsə də, ağrını yüngülləşdirmək üçün ümumi tövsiyələr mövcuddur. 

Həkimlər adətən miqrenin üç əsas növünü ayırd edirlər: aurayla müşayiət olunan, aurasız və xroniki – yəni ay ərzində 15 dəfədən çox təkrarlanan forma.

Kopseva vurğulayıb ki, belə ağrılara dözmək lazım deyil, dərmanı dərhal – tutmanın əvvəlində qəbul etmək lazımdır, lakin bu, yalnız həkim təyinatı ilə olmalıdır. O, həmçinin xəbərdarlıq edib ki, dərmanların həddindən artıq qəbulu dərmanla bağlı baş ağrısına səbəb ola bilər.

Miqren zamanı səssiz və qaranlıq otağa çəkilmək, uzanmaq, başa birbaşa soyuq kompres qoymaq və kifayət qədər su içmək məsləhət görülür.