Sınıqlar, çıxıqlar və digər sümük-əzələ sistemi xəstəlikləri ilə üzləşəndə hansı mütəxəssisə müraciət edəcəyinizlə bağlı seçim etmək çox vacibdir. Bəzi insanlar illərdir mövcud olan "sınıqçı" adlanan şəxslərə üz tutsalar da, bu yalnış seçim onların sağlamlığına ciddi ziyan vura bilər. Peşəkar həkimlər, o cümlədən ortoped-travmatoloqlar, bu sahədə ən doğru və təhlükəsiz ünvandır.

Azmedinfo.az xəbər verir ki, ortoped-travmatoloq, tibb üzrə fəlsəfə doktoru Laçın Məmmədovun sözlərinə görə, sınıqçıların adətən xalq təbabəti və ya nəsildən-nəslə keçən bilgilərlə fəaliyyət göstərməsi, onların müasir tibbi biliklərdən və texnologiyalardan məhrum olması deməkdir. Dəqiq diaqnoz qoymaq üçün rentgen, MRT və ya KT müayinələri aparmağa imkanları olmadığı üçün, bəzən sadə bir zədəni daha ciddi problem kimi qiymətləndirə bilər və ya əksinə, ciddi bir xəstəliyi nəzərdən qaçıra bilərlər. Bu da vəziyyətin daha da pisləşməsinə, bəzən isə geri dönməz fəsadlara səbəb ola bilər.

Həkimin vurğuladığı kimi, sümük-əzələ sistemi xəstəliklərinin müalicəsi elmi əsaslara söykənən bir prosesdir. Yalnız mütəxəssis həkimlər xəstəliyin kök səbəbini aşkar edib, ən effektiv və zərərsiz müalicə planını tərtib edə bilərlər. Onlar, müasir tibbi avadanlıqlar vasitəsilə zədələnmənin dərəcəsini dəqiq təyin edir və lazımi hallarda cərrahi müdaxiləyə qərar verirlər.

Unutmayın ki, sağlamlığınız ən dəyərli sərvətinizdir. Hər hansı bir sümük və ya əzələ problemi ilə qarşılaşdığınızda, dəqiq diaqnoz və etibarlı müalicə üçün yalnız lisenziyalı və peşəkar həkimlərə müraciət edin. Yanlış seçim etmək, uzun müddətli ağrılara, hərəkət məhdudiyyətinə və daha ciddi tibbi problemlərə səbəb ola bilər. Sağlam gələcəyiniz üçün doğru qərar verin.