Azərbaycanda orqan donorluğu və transplantasiyası sahəsində mühüm irəliləyişlər əldə edilib.

Azmedinfo.az xəbər verir ki, Orqan Donorluğu və Transplantasiyası üzrə Koordinasiya Mərkəzi İdarə Heyətinin sədri Yeganə Abbasovanın sözlərinə görə, Qafqazda ilk dəfə meyit donordan orqan köçürülməsi məhz ölkəmizdə həyata keçirilib. Bu uğurun əsas səbəbi Səhiyyə Nazirliyinin rəhbərliyi ilə hazırlanan hüquqi baza və 2022-ci ildən fəaliyyətə başlayan Mərkəzin işidir. Mərkəz, orqan ehtiyacı olan şəxslərin siyahısını tərtib edir, əməliyyatların ardıcıllığını təmin edir və transplantasiyadan sonrakı təqibi nəzarətdə saxlayır.

Yeganə Abbasovanın modern.az-da dərc edilən müsahibəsinə əsasən, orqan bağışlanması ilə bağlı maarifləndirmə işləri nəticəsində reyestrdən keçənlərin sayı artıb. Fevral ayından bu yana orqanlarını ölümündən sonra bağışlamaq üçün qeydiyyatdan keçənlərin sayı 50-dən 600-ə yüksəlib. Xüsusilə gənclər bu məsələyə daha müsbət yanaşır.

O, qeyd edib ki, Azərbaycan qanunvericiliyi bu sahədə daha təkmildir. Şəxs sağlığında orqanlarını bağışlamaq üçün reyestrdən keçibsə, beyin ölümü halında ailənin etirazı hüquqi qüvvəyə malik deyil. Əgər şəxs reyestrdə yoxdursa, ailənin razılığı tələb olunur. O, reanimatoloqların rolunun vacibliyini vurğulayıb və bildirib ki, beyin ölümü diaqnozu qoyulan xəstələrlə bağlı Mərkəzə vaxtında məlumat verilməsi orqan gözləyən insanların həyatını xilas edə bilər.

Hazırda 1021 Azərbaycan vətəndaşı orqan gözləyir, onların 500-ə yaxını böyrək xəstəsidir. Orqan transplantasiyasının xərcləri tamamilə İcbari Tibbi Sığorta tərəfindən qarşılanır. Ümumilikdə 15 orqan donor kimi götürülüb. Yaxın gələcək üçün planlar sırasında türk dövlətləri ilə birgə “Türk transplant” platformasının yaradılması da yer alır.