Sentyabrın 23-də Dövlət Gömrük Komitəsinin əməkdaşları növbəti dəfə xeyirxah ənənəyə qoşularaq könüllü qanvermə aksiyasında iştirak ediblər. Aksiya Komitənin Tibbi Xidmət İdarəsi və Səhiyyə Nazirliyinin Respublika Qan Bankının birgə təşkilatçılığı ilə həyata keçirilib.

Azmedinfo.az xəbər verir ki, tədbir çərçivəsində Qan Bankının peşəkar həkim-hematoloqları əvvəlcə donorların sağlamlıq vəziyyətini yoxlayıb, onların qanvermə üçün yararlı olub-olmadığını müəyyən ediblər. Daha sonra qanvermə prosesi həyata keçirilib.

Aksiyada ümumilikdə 100-dən çox gömrük əməkdaşı könüllü şəkildə qan verib. Onların göstərdiyi bu dəstək, talassemiyadan, hemofiliyadan və digər qan xəstəliklərindən əziyyət çəkən insanların sağlamlığına, həmçinin həyatlarının xilas edilməsinə töhfə vermək məqsədi daşıyır.

Gömrükçülərin bu nəcib addımı bir daha sübut edir ki, könüllü qanvermə aksiyaları yalnız tibbi baxımdan deyil, həm də yüksək insani və sosial dəyərlərin təbliği baxımından mühüm əhəmiyyət kəsb edir.