İNURİA Hüquq Platformasının Tibb Hüququ Qrupunun növbəti iclası keçirilib. Görüşdə tibbi hüquq sahəsində aktual məsələlər geniş müzakirə olunub, gələcək fəaliyyət istiqamətləri barədə fikir mübadiləsi aparılıb.

Azmedinfo.az xəbər verir ki, iclasda Azərbaycan Pediatrlar Assosiasiyasının sədri, Avrasiya Uşaq Həkimləri Federasiyasının vitse-prezidenti, Azərbaycan Tibb Universitetinin dosenti, tibb üzrə fəlsəfə doktoru Təranə Tağı-zadə də iştirak edib.

Pediatr alim xüsusilə uşaqların sağlamlıq hüquqlarının qorunmasının vacibliyinə diqqət çəkib, pediatriyada hüquqi mexanizmlərin gücləndirilməsinin əhəmiyyətini vurğulayıb.

Təranə Tağı-zadə qeyd edib ki, uşaqların keyfiyyətli tibbi xidmətə bərabər çıxışının təmin olunması, onların sağlamlıqla bağlı hüquqlarının beynəlxalq standartlara uyğun müdafiəsi və valideynlərin maarifləndirilməsi bu sahədə əsas prioritetlərdən olmalıdır.

Görüşdə İNJURİA Hüquq Platformasının rəhbəri Kəmalə Məmmədova tibb hüququnun inkişafı və gələcək istiqamətləri ilə bağlı çıxış edərək qeyd edib ki, platforma artıq 5 ildir Azərbaycanda tibbi hüquq sahəsində fəaliyyət göstərir. Bu illər ərzində həm həkimlərin, həm də hüquqşünasların biliklərinin artırılmasına, hüquqi mexanizmlərin təkmilləşdirilməsinə mühüm töhfələr verib və verməkdə davam edir.

Daha sonra görüşdə iştirak edən hüquqşünaslar və alimlər tibbi hüququn təkmilləşdirilməsi ilə bağlı öz fikir və təkliflərini bölüşüblər. Bildirilib ki, belə müzakirələr pasiyent hüquqlarının qorunmasına, həkim və hüquqşünaslar arasında əməkdaşlığın gücləndirilməsinə və ümumilikdə tibbi hüququn inkişafına mühüm töhfə verir.

İNURİA Hüquq Platforması olaraq, tibbi hüququn təkmilləşdirilməsi istiqamətində ardıcıl addımların atılacağı vurğulanıb.