İnsult getdikcə daha çox gənc yaşlı insanlarda diaqnoz olunur. Nevroloq Olqa Sokolovanın məlumatına görə, son on ildə 45 yaşadək insult keçirən pasiyentlərin sayı artıb. Mütəxəssis qeyd edir ki, çox vaxt problemin inkişafına uzun müddət hiss olunmadan qalan gizli amillər səbəb olur.

Azmedinfo.az "Medikforum"a istinadən yazır ki, belə risklər arasında həkim yüksək arterial təzyiqi göstərir. Bu, xoşagəlməz əlamətlərlə müşayiət olunmaya bilər, amma artıq damar divarına zərər vurur. O vurğulayır ki, hətta yüngül hipertenziya insultun aparıcı səbəblərindən birinə çevrilir. Əlavə təhlükə isə simptomsuz aritmiyadır: adi EKQ onu qeydə almaya bilər, lakin uzunmüddətli ürək ritminin monitorinqi aşkar etməyə imkan verir. Ayrı risk qrupunu oral kontraseptivlər qəbul edən və eyni zamanda siqaret çəkən qadınlar təşkil edir, xüsusilə də miqreni olanlar. Mütəxəssisin sözlərinə görə, bu cür birləşmə insult ehtimalını xeyli artırır.

Xroniki stress də az rol oynamır: daimi sinir gərginliyi, yuxusuzluq və emosional tükənmə həkim tərəfindən beynə qarşı yavaş hücum kimi qiymətləndirilir. Sokolova xüsusilə qısamüddətli simptomlara diqqət yetirməyin vacibliyini vurğulayır. Çox vaxt bu əlamətlərə fikir verilmir. Belə əlamətlərə qəfil üz və ya ətrafların keyiməsi, kəskin zəiflik, nitqin pozulması, qeyri-adi baş ağrıları, görmədə işıqlı parıltılar və ya şüurun qarışması aiddir. Hətta bu əlamətlər tez keçsə də, onlar insultun xəbərçisi ola bilər və dərhal həkimə müraciət tələb edir.