Sentyabrın 25-də Şəki şəhərində ilk dəfə olaraq “Şəki Sağlamlıq Günləri” adlı genişmiqyaslı aksiya baş tutdu. Bu sosial əhəmiyyətli tədbir çərçivəsində şəhid və qazilərin ailə üzvləri üçün ödənişsiz kardioloji müayinələr təşkil olunaraq, onların sağlamlığının qorunması istiqamətində mühüm addım atıldı.

Azmedinfo.az xəbər verir ki, Azərbaycan Respublikasının Səhiyyə Nazirliyi Elmi-Tədqiqat Kardiologiya İnstitutunun (ETKİ) təşkilatçılığı, İcbari Tibbi Sığorta üzrə Dövlət Agentliyi və TƏBİB-in dəstəyi ilə həyata keçirilən aksiya Şəki Rayon Mərkəzi Xəstəxanasında baş tutdu. Burada müxtəlif ixtisaslardan olan həkimlər və tibbi personal bir araya gələrək vətəndaşların ümumi sağlamlıq göstəricilərini yoxladı, ürək-damar sisteminin vəziyyətini dəyərləndirdi, laborator analizlər apardı və peşəkar tibbi məsləhətlər verdi. Gün ərzində 200-dən artıq vətəndaş müayinədən keçərək sağlamlıqları barədə ətraflı məlumat əldə etdi.

Tədbirdə çıxış edən ETKİ-nin direktoru, professor Gülnaz Dadaşova vurğuladı ki, belə təşəbbüslər insanların sağlamlıq problemlərinin erkən aşkarlanmasına, vaxtında müalicəyə başlanmasına və həyat keyfiyyətinin yüksəldilməsinə imkan yaradır. O, xüsusilə qeyd etdi ki, şəhid və qazilərimizin ailə üzvlərinə göstərilən bu diqqət və qayğı dövlətimizin sosial siyasətinin mühüm tərkib hissəsidir: “Sağlamlıq yalnız fərdin deyil, bütövlükdə cəmiyyətin rifahıdır. Bu gün burada həyata keçirilən müayinələr dövlətin və səhiyyə qurumlarımızın vətəndaş sağlamlığına verdiyi yüksək dəyərin bariz nümunəsidir. Şəhidlərimizin ailələrinə, qazilərimizin yaxınlarına göstərilən qayğı isə mənəvi borcumuzdur və biz bu missiyanı böyük qürurla icra edirik.”

Aksiya iştirakçıları təşkilatçılara dərin minnətdarlıqlarını bildirərək, bu cür tədbirlərin davamlı şəkildə keçirilməsinin vacibliyini vurğuladılar. Qeyd edək ki, müayinələr təkcə Şəki sakinlərinin deyil, həm də Qax, Balakən, Zaqatala, Qəbələ, Oğuz, Mingəçevir və Ağdaş rayonlarından gələn vətəndaşların da böyük marağına səbəb olub.