Həkim məsləhəti olmadan antibiotik istifadəsi dünyanın ən aktual səhiyyə problemlərindən biridir. Təəssüf ki, bir çox insanlar soyuqdəymə və ya virus infeksiyası zamanı belə, antibiotik qəbul etməklə daha tez sağalacaqlarına inanırlar. Halbuki bu, sağlamlığa böyük zərbə vurur.

Azmedinfo.az mütəxəssislərin rəyinə əsaslanmaqla bildirir ki, Antibiotiklər yalnız bakterial infeksiyalara qarşı təsirli olur, virus xəstəliklərində isə heç bir fayda vermir. Əksinə, səbəbsiz istifadə nəticəsində mikroorqanizmlər müqavimət qazanır, gələcəkdə həmin dərmanlar təsirini itirir və daha güclü infeksiyalarla mübarizə aparmaq çətinləşir.

Antibiotiklərin nəzarətsiz istifadəsi həm də orqanizmdə allergik reaksiyalar, bağırsaq mikroflorasının pozulması, qaraciyər və böyrəklərdə əlavə yük kimi ciddi fəsadlar yarada bilər. Bu səbəbdən antibiotik qəbulunu yalnız həkim göstərişi ilə, düzgün diaqnoz əsasında və təyin olunmuş dozaya, eləcə də gün sayına tam əməl etməklə aparmaq vacibdir. Müalicəni yarımçıq kəsmək, dozanı özbaşına artırmaq və ya azaltmaq da antibiotik müqavimətinin formalaşmasına səbəb olur.

Unutmayın ki, sağlamlığınız ən qiymətli sərvətinizdir. Özbaşına dərman qəbul etməyin, antibiotiklərlə müalicəni yalnız ixtisaslı həkimin nəzarəti altında aparın. Antimikrob müqavimətinin qarşısını almaq hər birimizin üzərinə düşən məsuliyyətdir.