Övladlığa verilmə prosesi cəmiyyətin ən həssas mövzularından biri hesab olunur. Bu, yalnız bir ailənin övlad həsrətinə son qoymaqla kifayətlənmir, həm də valideyn himayəsindən məhrum olmuş uşaqların həyatında tamamilə yeni bir səhifə açır. Dünyanın bir çox ölkəsində olduğu kimi, Azərbaycanda da övladlığa götürmənin əsas məqsədi uşaqların ailə mühitində böyüməsini təmin etmək, onların sağlam inkişafına, təhsil almasına və psixoloji sabitliyinə dəstək göstərməkdir.

Azmedinfo.az xəbər verir ki, mövzu ilə bağlı Əmək və Əhalinin Sosial Müdafiəsi Nazirliyi yanında Sosial Xidmətlər Agentliyi Baku.ws-in sorğusuna cavab olaraq məlumat yayıb.

Cari ildə Azərbaycanda neçə uşaq övladlığa verilib? Bunlar arasında xarici vətəndaşlar da varmı?

Bildirilib ki, 2025-ci ildə 103 uşaq övladlığa götürülüb. 2019-cu ilin 1 noyabr tarixindən bu günədək isə ümumilikdə 772 uşaq övladlığa verilib. Onlardan 381-i qız, 391-i isə oğlandır.

Məlumatda əlavə edilib ki, son illərdə Azərbaycanda övladlığa uşaq götürmək üçün müraciət edən xarici vətəndaşlar da olub. Həmin müraciətlərin dördü üzrə yekun məhkəmə qətnaməsi çıxarılaraq uşaqların övladlığa verilməsi təmin edilib.