“Gənclik Mall” ticarət mərkəzində Azərbaycan Respublikası Səhiyyə Nazirliyinin Elmi-Tədqiqat Kardiologiya İnstitutunun təşkilatçılığı ilə Ümumdünya Ürək Gününə həsr olunmuş genişmiqyaslı maarifləndirici-tibbi aksiya təşkil olunub.

Azmedinfo.az xəbər verir ki, aksiya zamanı institutun peşəkar həkim-mütəxəssisləri vətəndaşlara ürək-damar sistemi (ÜDS) xəstəlikləri, infarktın qarşısının alınması yolları, sağlam həyat tərzinin əhəmiyyəti və risk faktorları barədə ətraflı məlumat veriblər. Bildirilib ki, son illərdə ÜDS xəstəliklərinin “cavanlaşması” müşahidə olunur. Bu, əsasən qeyri-sağlam qidalanma, hərəkətsiz həyat tərzi, ətraf mühitin çirklənməsi, psixoloji gərginlik və ən əsası insanların vaxtında həkim müayinəsindən keçməməsi ilə bağlıdır.

Elmi-Tədqiqat Kardiologiya İnstitutunun direktoru, professor Gülnaz Dadaşova çıxışında vurğulayıb ki, bu cür aksiyalar əhalinin maarifləndirilməsi, xəstəliklərin erkən profilaktikası və sağlam həyat tərzinin təşviqi baxımından mühüm əhəmiyyət kəsb edir.

Aksiya çərçivəsində portativ tibbi cihazlardan istifadə olunaraq vətəndaşların qan təzyiqi, qanda oksigenin miqdarı və şəkər səviyyəsi ölçülüb. Hər bir vətəndaşa nəticələrlə bağlı dərhal izahlı məsləhətlər təqdim edilib. Tədbir paytaxt sakinlərinin böyük marağına səbəb olub və gün ərzində yüzlərlə insan maarifləndirici xidmətlərdən yararlanıb.

Ümumdünya Ürək Gününə həsr olunmuş bu aksiya həm qlobal, həm də milli miqyasda ürək sağlamlığının prioritet məsələlərdən biri olduğunu bir daha gündəmə gətirib.