Qadcetlərdən istifadə quru göz sindromunu yaradır

Dünyada quru göz sindromunun yayılması sürətlə artır və əsas risk qrupunu monitor qarşısında uzun müddət işləyən ofis əməkdaşları təşkil edir.

Azmedinfo.az xəbər verir ki, bu narahatedici tendensiya barədə tibb elmləri doktoru, professor, oftalmoloq-cərrah Tatyana Şilova 360.ru-ya açıqlama verib.

Mütəxəssisin sözlərinə görə, günün sonuna doğru diskomfort, gözdə yad cisim hissi, qızartı və görmənin zəifləməsi infeksiya ilə deyil, uzunmüddətli ekran təsiri və otaqlarda quru hava ilə bağlıdır. Şilova bildirib ki, bu vəziyyət uğurla müalicə oluna bilir. Müalicə iş rejiminin tənzimlənməsi, havanın rütubətləndirilməsi, göz qapaqlarının gigiyenası və fərdi seçilmiş preparatlardan ibarətdir.

Ekspert vurğulayıb ki, müalicəyə sadə, lakin təsirli addımlardan başlamaq lazımdır. Burada iş prosesinin düzgün təşkili və ətraf mühitin rolu mühümdür.

O, 20-20-20 qaydasını xatırladıb: "Hər 20 dəqiqədən bir 20 saniyəlik fasilə verin, uzağa baxın və şüurlu şəkildə bir neçə dəfə göz qırpın. Evin və ofisin havasının rütubəti 40–60% olmalıdır, kondisioner isə birbaşa üzə üfürməməlidir”.

Oftalmoloq-cərrah həmçinin iş masasının düzgün təşkilinə diqqət çəkib: monitor göz səviyyəsindən bir qədər aşağıda yerləşməli, şrift və parlaqlıq isə rahat qavranıla biləcək dərəcədə olmalıdır.

Həkim əlavə edib ki, gündəlik olaraq 5–10 dəqiqəlik isti kompres və ardınca yüngül göz qapağı masajı da çox faydalıdır.