Narkotik və alkoqol asılılığı cəmiyyətin sağlamlığına ən ciddi təhlükələrdən biridir. Statistik göstəricilərdən göründüyü kimi, hər gün Respublika Narkoloji Mərkəzinə orta hesabla 12-yə yaxın vətəndaş müraciət edir. Bu isə problemin aktuallığını bir daha sübut edir.

Azmedinfo.az xəbər ki, bu sözləri Respublika Narkoloji Mərkəzinin baş direktoru, psixiatr-narkoloq Fəzayıl Sadıqov Azərtac-a müsahibəsində bildirib. Ekspert qeyd edib ki, müraciət edənlərin bir qismi tibbi ekspertiza və ya hərbi xidmətə yararlılıq məqsədilə gəlir, lakin əsas hissəni xroniki asılılıqdan əziyyət çəkənlər təşkil edir. Onların müalicəsində yalnız dərman terapiyası deyil, psixoterapevtik söhbətlər, qrup məşğələləri və psixososial dəstək metodları da mühüm rol oynayır.

Baş direktorun sözlərinə görə, müalicənin əsas məqsədi xəstələrin vəziyyətini stabilləşdirmək, remissiya müddətini uzatmaq və həyat keyfiyyətini yüksəltməkdir. Sadıqov həmçinin vurğulayıb ki, özəl reabilitasiya mərkəzlərinin fəaliyyəti hüquqi və tibbi normalara əsaslanmalı, burada müalicə yalnız ixtisaslı həkimlərin nəzarəti ilə aparılmalıdır. Əks halda, yanlış yanaşmalar xəstələrdə vəziyyətin daha da ağırlaşmasına səbəb ola bilər.