Mədə xorası müasir müalicə üsulları ilə çox vaxt tam sağalır.

Azmedinfo.az xəbər verir ki, qastroenteroloq-hepatoloq və invaziv-endoskopist Dr. Aqil Ağakişiyevin sözlərinə görə, əsas məqsəd yaranın səbəblərini aradan qaldırmaq (məsələn, Helikobakteriya pylori infeksiyası və ya uzunmüddətli ağrıkəsici istifadəsi), mədə turşusunu azaltmaq və toxumaların bərpasına imkan yaratmaqdır.

Ekspert qeyd edib ki, müalicə prosesində infeksiyanın tam təmizlənməsi yaranın yenidən əmələ gəlmə ehtimalını xeyli aşağı salır. Bu zaman ağrıların sürətlə azalmasına aldanmaq olmaz; yaranın tam sağalması üçün müalicəni sona qədər davam etdirmək vacibdir.

"Müalicə edildikcə yara əvvəlcə kiçilir, kənarları örtülür və fibroz toxuma ilə bağlanır. Kiçik xoralar sağalandan sonra iz buraxmır, daha böyük xoraların yerində isə çapıq qalır. Mədə xoralarının sağalması bəzən təkrar endoskopiya ilə təsdiqlənir", - deyə həkim vurğulayıb.

O, əlavə edib ki, siqareti tərgitmək, alkoqoldan, stresdən və mədəni qıcıqlandıran qidalardan uzaq durmaq, həmçinin balanslı qidalanmaq müalicənin effektivliyini artırır və yeni xora riskini azaldır.