Donorluq prosesi yüksək tibbi və etik qaydalara əsaslanır. Əvvəlcə beyin ölümü diaqnozu ixtisaslı və təcrübəli həkimlərdən ibarət konsilium tərəfindən təsdiqlənir. Daha sonra orqanlar hərtərəfli qiymətləndirilir və yalnız sağlam, uyğun hesab edilən orqanlar seçilir.

Azmedinfo.az xəbər verir ki, mütəxəssislərin bildirdiyinə görə, cərrahlar tərəfindən orqanlar xüsusi tibbi şəraitdə, gigiyenik qaydalara tam riayət olunmaqla çıxarılır və uyğun resipientlərə köçürülür. Beləcə, həyatla mübarizə aparan insanlara yeni yaşamaq şansı verilir.

Donorun bədəni estetik tikişlərlə bərpa olunur və ailəsinə təhvil verilir. Bütün proses tibbin ən yüksək etik standartlarına uyğun şəkildə həyata keçirilir.

Orqan donorluğu — bir həyatın bitdiyi yerdə başqa bir həyatın başlanğıcıdır. Bu, təkcə tibbi deyil, həm də mənəvi və sosial baxımdan insanlığın ən nəcib borcudur.

Unutmayaq ki, bir insanı xilas etmək, bütün insanlığı xilas etməkdir!

Orqan Donorluğu və Transplantasiyası üzrə Koordinasiya Mərkəzi