Uveit - gözün daxilində gedən iltihab prosesin olmasıdır, yəni gözün ön hissəsindən - buynuz qişasından torlu qişasına qədər iltihabi proses baş verir. Hər yaşda ortaya çıxa biləcək bir problemdir. Uveit əsasən endogen mənşəlidir, daxildən qaynaqlanır. Daha çox autoimmun xəstəliyi olan insanlarda, revmatoloji xəstələrdə əmələ gəlir. Yəni bədənin özünün gözün qişalarına qarşı verdiyi bir reaksiya kimi ortaya çıxır. Az hallarda isə infeksiyalara bağlı əmələ gəlir. Bu vərəmdən tutmuş dodaqda çıxan uçuğa qədər geniş spektrli xəstəlik növləridir.

Azmedinfo.az xəbər verir ki, Uveit yeni başlayanda əlamətləri yüngül olur, yəni yüngül qızartı, yüngül sulanma, görmənin azacıq bulanması, yüngül ağrılar olur. Proses dərinləşdikcə əlamətlər daha da kəskinləşir. Uveit təkcə göz xəstəliyi olmadığı üçün sadəcə göz həkimi tərəfindən müalicə olunmamalıdır. Terapevt ya da revmatoloqlarla birgə müalicəsi uyğun şəkildə apardıqda daha effektiv nəticə əldə olunur.

Uveiti olan xəstələrdə yanaşı olaraq ikincili katarakta, qlaukoma, buynuz qişanın bəyazlaşması, torlu qişanın qopması, gözün şüşəvari cismində bəyazlaşmalar baş verə bilir. Bu hallarda gözə cərrahi müdaxilə edilir.

Uveitlər immun sistemi zəiflədikcə təkrarlanır. Təkrarlanma səbəbi yenə də göz olmur, orqanizm olur və növbəti tutma əvvəlkindən daha ağır keçir, daha çox qalıq əlamətlə qalır. Buna görə uveiti olan xəstələr mütləq olaraq vaxtında həm oftalmoloqun həm də revmatoloq və ya terapevtin müayinəsindən keçməlidirlər.

Bakı Baş Səhiyyə Mərkəzi